Ubwongereza: Manchester City yamze kumvikana na Donnarumma
Ikipe ya Manchester City ishobora gutandukana n’umunyezamu wayo wa mbere, Ederson Moraes, igeze kure ibiganiro na Gianluigi Donnarumma, umunyezamu uherutse gutandukana na Paris Saint-Germain.
Mbere y’uko uyu mwaka w’imikino wa 2025/26 utangira, Donnarumma ntiyishimiye ko uwari umutoza we Luis Enrique yamukuye mu bakinnyi biteguraga guhura na Tottenham Hotspur kuri Super Coupe ya UEFA.
Ni umwanzuro watumye afata icyemezo cyo gutandukana n’iyi kipe yo mu Bufaransa yafashije kwegukana UEFA Champions League ya mbere mu mwateka, mu 2024/25.
Amakipe menshi yiganjemo ayo mu Bwongereza yatangiye kureshya uyu mukinnyi, gusa bivugwa ko ibiganiro byagenze neza hagati ye na Manchester City iri mu makipe akomeye ku Isi.
Uyu munyezamu w’imyaka 26 ukomoka mu Butaliyani ntabwo arashyira umukono ku masezerano, kuko Man City igitegereje icyemezo ntakuka cya Ederson Santana de Moraes wifuza kwerekeza muri Galatasaray S.K yo muri Turikiya.
Bivugwa ko iyi kipe yo mu mujyi wa Manchester yifuza kumutangaho miliyoni 40,6$.
Paris Saint-Germain yasimbuje Donnarumma, aho yasinyishije Umufaransa w’imyaka 23 Lucas Chevalier.
Lucien KAMANZI
