Premier League igiye guhagararirwa n’ amakipe 9 i Burayi.

Mu makipe yabonye itike ya UEFA Champions League harimo Arsenal, Manchester City, Manchester United, Aston Villa na Liverpool. Aya yose yabonye itike binyuze mu kurangiza mu myanya itanu ya mbere muri Premier League, nyuma y’ uko u Bwongereza bwahawe umwanya wa gatanu wa Champions League kubera umusaruro mwiza amakipe yabwo yatanze i Burayi.

Manchester United yongeye gusubira muri Champions League nyuma y’ igihe ititabira iri rushanwa, naho Aston Villa ikomeza urugendo rwayo rwiza ku rwego mpuzamahanga nyuma yo kwitwara neza muri UEFA Europa League.

Mu makipe azakina UEFA Europa League harimo Bournemouth, Sunderland ndetse na Crystal Palace. Bournemouth yabonye itike nyuma yo kurangiza ku mwanya wa gatandatu muri Premier League, ikindi kandi ni ubwa mbere mu mateka yayo igiye gukina irushanwa ryo ku mugabane w’i Burayi.

Sunderland yo yabonye iyi tike nyuma yo gusoreza ku mwanya wa karindwi, ibintu byatangaje benshi kuko yari ikipe yazamutse muri Premier League 2025/2026. Iyi kipe igiye kongera gukina i Burayi ku nshuro ya kabiri gusa mu mateka yayo kuko yaherukagayo mu 1973/1974.

Ku rundi ruhande, Crystal Palace yabonye itike ya UEFA Europa League nyuma yo kwegukana igikombe cya FA Cup, ndetse iyi ikaba ari yo nshuro ya mbere iyi kipe izakina amarushanwa y’i Burayi. (Source:The Standard)

Mu makipe azakina UEFA Conference League harimo Brighton & Hove Albion yabonye itike nyuma yo gusoreza ku mwanya wa munani muri shampiyona. Brighton izaba igarutse muri aya marushanwa ku nshuro ya kabiri mu mateka yayo kuko yaherukagamo 2023/2024.

 Ibi byose byatumye Premier League iba shampiyona ya mbere ibonye amakipe icyenda azakina amarushanwa y’i Burayi mu mwaka umwe, ibintu byatewe cyane n’ imiterere mishya ya UEFA ndetse n’ umusaruro mwiza amakipe y’ Abongereza yakomeje gutanga ku mugabane w’u Burayi.

 Kohereza amakipe icyenda mu marushanwa y’i Burayi ni ikimenyetso gikomeye cyerekana imbaraga za Premier League ku rwego mpuzamahanga. Kuba amakipe nka Bournemouth na Crystal Palace agiye gukina i Burayi bwa mbere, bigaragaza uburyo irushanwa rya Premier League rikomeje guha amahirwe amakipe menshi yo kuzamuka no gukora amateka mashya. Abakunzi b’ umupira w’ amaguru bategereje kureba niba aya makipe azakomeza kwitwara neza no guhagararira neza u Bwongereza ku mugabane w’u Burayi.

Jacques Roger NSHIMIYIMANA