Ukraine yongeye kugaba ibitero by'indege zitagira abapilote ku bubiko bwa Wildberries mu Burusiya
Ukraine yongeye kugaba ibitero by'indege zitagira abapilote (drones) ku bubiko bw'isosiyete Wildberries, urubuga runini rw'ubucuruzi bwo kuri internet mu Burusiya. Ni ubwa kabiri muri iki cyumweru ibyo bigo by'ububiko biterwa.
Nk'uko abayobozi b'uturere twibasiwe babitangaje, abantu 15 bakomerekeye muri ibyo bitero. Abakozi bakoreraga muri ayo bubiko bahise bimurwa mu rwego rwo kubarinda.
Ibitero byibasiye ibigo by'ububiko biherereye mu mijyi ya Krasnodar na Nevinnomyssk, mu majyepfo y'uburengerazuba bw'u Burusiya.
Perezida wa Ukraine, Volodymyr Zelensky, yavuze ko ibyo bitero byagabwe ku bigo byifashishwaga mu gutanga ibikoresho bifasha ingabo z'u Burusiya, birimo ibice by'indege zitagira abapilote (drones), ibikoresho by'ikoranabuhanga bwo kuyobora ibikorwa (navigation) n'ibindi bikoresho bya gisirikare.
Uwashinze Wildberries, Tatyana Kim, yamaganye ibyo bitero, avuga ko byibasiye abakozi b'inzirakarengane bari mu kazi. Mu butumwa yanyujije kuri Telegram yagize ati: "Biragoye kubona amagambo asobanura agahinda n'amarangamutima twatewe n'ibi bitero. Ariko tuzakomeza gukora akazi kacu ku nyungu z'abaturage."
Guverineri w'akarere ka Stavropol yatangaje ko abantu batanu bakomerekeye mu gitero cyagabwe ku bubiko bwa Nevinnomyssk, bose bahise bahabwa ubuvuzi kandi nta n'umwe washyizwe mu bitaro.
Mu karere ka Krasnodar, abantu icumi bakomerekeye mu gitero cyibasiye ububiko, barimo batatu bakomeretse bikomeye. Ubuyobozi bw'ako karere bwatangaje kandi ko irindi tero ryibasiye ikigega kibikwamo peteroli, riteza inkongi y'umuriro, ndetse umukozi umwe ahasiga ubuzima nyuma yo kugwirwa n'ibisigazwa by'indege ya drone.
Amashusho yakwirakwijwe ku mbuga nkoranyambaga kandi yemejwe n'abasesenguzi ba BBC agaragaza imyotsi myinshi n'inkongi z'umuriro zikomeye zafashe ayo mabubiko nyuma y'ibitero.
Perezida Zelensky yavuze kandi ko Ukraine yarashe ikigega cya peteroli, ubwato butwara peteroli (tanker), hamwe n'amato ane atwara imizigo yo mu matsinda y'amato u Burusiya bukoresha mu kwirinda ibihano mpuzamahanga, akorera mu Nyanja ya Azov no mu Nyanja y'Umukara.
Abasesenguzi bavuga ko impamvu nyamukuru yo kwibasira ububiko bwa Wildberries ari uko bushinjwa gukoreshwa mu gutanga ibikoresho bifite uruhare mu gushyigikira ibikorwa bya gisirikare by'u Burusiya, harimo ibikoresho by'ikoranabuhanga n'ibindi bishobora gukoreshwa mu nganda z'intwaro.
Iki ni ubwa kabiri mu minsi ine gusa ububiko bwa Wildberries bugabweho ibitero. Mu mpera z'icyumweru gishize, ibindi bigo by'iyi sosiyete byo mu mijyi ya Tambov na Elektrostal nabyo byari byatewe n'indege za Ukraine.
