Triathlon: Umukino wihariye uhuza koga, gutwara igare no kwiruka

Amavu n’amavuko ya Triathlon

Uyu mukino watangiriye mu Bufaransa mu myaka ya 1920, aho wari uzwi ku izina rya “Les trois sports” cyangwa “La course des débrouillards”, bisobanuye "imikino itatu" cyangwa "isiganwa ry’abanyamurava". Muri icyo gihe, irushanwa ryatangiraga no koga, hagakurikiraho gutwara igare, bagasoza biruka.

Triathlon y’ubu, ifite imiterere igezweho, yatangiye mu 1974 mu mujyi wa San Diego, California (USA). Mu 1978 hatangijwe isiganwa rikomeye ryiswe Ironman ribera muri Hawaii, rikubiyemo ibi bikorwa: koga 3.8 km, gutwara igare 180 km no kwiruka intera ya marato ya 42.2 km.

Triathlon yinjiye mu mikino Olempike mu mwaka wa 2000, ubwo yakinwaga bwa mbere mu mikino yabereye i Sydney, muri Australia. Ibyo byafashije gukomeza guteza imbere uyu mukino ku rwego rw’isi.

Uko Triathlon ikinwa

Triathlon ikinwa mu byiciro bitatu bikurikirana, nta kuruhuka hagati yabyo:

1.    Koga: Abakinnyi batangirira mu mazi magari nk’inzuzi, ibiyaga cyangwa inyanja.

2.    Gutwara igare: Nyuma yo kuva mu mazi, bahindura imyenda bakajya ku magare, bakanyura ku ntera yagenwe.

3.    Kwiruka: Basoza irushanwa biruka ku butaka.

Mu gihe cy’irushanwa, abakinnyi banyura mu bice byihariye byitwa “transition zones” aho bahindurira ibikoresho cyangwa imyambaro:

• T1: kuva mu mazi bajya ku igare
• T2: kuva ku igare bajya kwiruka

Utsinda ni umukinnyi cyangwa itsinda rifite igihe gito kurusha abandi mu bikorwa byose, harimo n’iminota ikoreshwa mu mpinduka hagati y’ibyiciro.

Ubwoko bw’isiganwa rya Triathlon

Triathlon mu Rwanda

Nubwo Triathlon itaramenyekana cyane mu Rwanda nk’uko bimeze ku yindi mikino, hari icyizere cy’uko izagenda itera imbere, cyane cyane mu rubyiruko rukunda siporo n’imyitozo ngororamubiri.

Ni umukino wubaka imbaraga z’umubiri n’ubwenge, ukanatoza abawukina kwihangana, gutegura neza igihe no kugira indangagaciro za siporo. Triathlon ikwiye gushyigikirwa nk’umukino ushobora guteza imbere siporo rusange, ndetse no kongerera amahirwe urubyiruko rwifuza guhagararira u Rwanda ku rwego mpuzamahanga.

Jacques Roger NSHIMIYIMANA