Nyaruguru: Ngoma hatanzwe inkoko 200 ku baturage batsindiye agashya kiswe "Ikayi y’Umurimo w’Umunsi”

Aba baturage bahawe izi nkoko bibukije akamaro ko gukomeza umuco wo korozanya no gusangira n’abandi baturage bo mu tundi tugari, hagamijwe kwagura iyi gahunda no kuyigira iya bose.

Umuyobozi w'umurenge wa Ngoma, Bizimana yasabye ababyeyi kwibanda ku kugaburira abana indyo ikungahaye ku bikomoka ku matungo, by’umwihariko gutanga igi rimwe ku munsi ku mafunguro ategurirwa umwana, mu rwego rwo kumufasha gukura neza no kurwanya imirire mibi.

Ati “Kugaburira umwana indyo yuzuye kandi ikungahaye kubikomoka ku matungo harimo n’amagi ni ingenzi kuko bifasha umwana gukura neza.”

Yakomeje agaragaza ko guteza imbere gahunda yo korora amatungo magufi, nk’inkoko, ari ingenzi cyane kuko yororoka vuba kandi akagira uruhare runini mu guteza imbere ubuzima bw’abana bato n’imiryango muri rusange.

Abisobanura ati “Korora amatungo magufi ni ingenzi mu miryango yanyu, mugomba rero kugomeza kugira umuco wo korora ayo matungo magufi byumwihariko inkoko kuko ni z’imwe mu matungo magufi yororoka vuba”.

Bamwe mu bahawe inkoko agaragaza ko zigiye kabafasha guhindura imibereho yabo ndetse bazanagabanya imirire mibi n’igwingira mu bana babo.

Umwe muri bo yagize ati “Twishimiye izi nkoko duhawe nk’amatungo magufi kandi twizeye ko hari kinini zigiye guhindura ku mibereho twari dufite mu miryango yacu, zigiye kudufasha kurwanya imirire mibi, igwingira mu bana bacu, mbese zizadufasha muri byinshi dore inkoko inororoka byihuse.”

Yanagaragaje ko ibi bihembo babikesha kubahiriza gahunda y’agashya yatangijwe mu murenge wa Ngoma mu karere ka Nyaruguru yiswe “Ikayi y’Umurimo w’Umunsi”  aharanira kuzuza buri gikorwa cyose cyakozwe mu mihigo y’umuryango kandi buri munsi.

Yagize ati “Ntagikorwa na kimwe dukora nk’umuryango ngo ntitucyandike mu ikayi y’umurimo w’umunsi nk'uko tubisabwa n’ubuyobozi bwacu, ibi rero nibyo byatumye natwe dutekerezwa mu bagomba guhabwa ibihembo arizo nkoko mwabonye natwe baduhaye.”

Iki gikorwa cyo guhemba abaturage bahize abandi muri gahunda y’agashya yiswe“Ikayi y’Umurimo w’Umunsi” mu murenge wa Ngoma mu karere ka Nyaruguru cyitabiriwe n’abayobozi b’inzego zitandukanye muri uyu murenge ndetse n’abaturage muri rusange.  

Hatanzwe inkoko 200 zatanzwe nk’igihembo cyatanzwe na Minisiteri y’Ubutegetsi bw’Igihugu (MINALOC), gifite agaciro k’amafaranga y’u Rwanda angana na miliyoni imwe (1,000,000 Frw).

      Abaturage bishimiye ko bahawe inkoko (ifoto/N.Charles)

Ntamwemezi Charles/Nyaruguru