Xabi Alonso yatandukanye na Real Madrid kubwumvikane
Ikipe ya Real Madrid ibinyujije ku mbuga nkoranyambaga zayo, yatangaje ko umutoza Xabi Alonso yamaze kuva muri iyi kipe ku bwumvikane bw’impande zombi, nyuma y’amezi 7 gusa ayitoza.
Uku gutandukana kuje nyuma y'uko mu ijoro ryakeye yaraye atsinzwe n’ikipe ya FC Barcelona ibitego 3-2, mu mukino wanyuma w’igikombe kiruta ibindi muri Espanye kizwi nka Spanish Super Cup.
Alonso wakiniye amakipe arimo Real madrid, Liverpool na Bayern Munich, yagizwe umutoza wa Real Madrid mu mpeshyi ishize avuye mu ikipe ya Bayer Leverkusen yo mu budage, aho yafashije iyi kipe kwegukana igikombe cya shampiyona y’Ubudage ku nshuro ya mbere mu mateka yayo.
Yahise asimbuzwa by’agateganyo undi nawe wahoze akinira Liverpool ndetse na Real Madrid, Álvaro Arbeloa, wari usanganwe inshingano zo gutoza ikipe ya Real Madrid ya kabiri kuva muri Kamena 2025.
Alonso avuye muri Real Madrid ikipe iri ku mwanya wa kabiri muri La Liga, irushwa amanota ane n’ikipe ya FC Barcelona bahanganye.
Iyi kipe kandi Xabi Alonso yatozaga yatsinzwe na Liverpool ndetse na Manchester City muri UEFA Champions League muri uyu mwaka w’imikino.
Mu mwaka ushize w’imikino, ikipe ya Real Madrid yarangije ari iya kabiri muri La Liga.
