Kayonza :Guha amagare abajyanama b'ubuzima bizavana aka karere ku mwanya wa nyuma

 Abajyanama b’ubuzima bitwaye neza mu kurwanya ndetse no kurandura iyi ndwara hirya no hino bamaze gushyikirizwa aya magare  bavuga ko bishimiye cyane aya magare bahawe kuko azabafasha mu kazi kabo ka buri munsi ndetse no kwiteza imbere.Abaganiriye na Radio Televiziyo Izuba bavuga ko kubura uburyo bwo kugenda ngo banyaruke byari imwe mu nzitizi bahuraga nayo mu gihe bari no mu bukangurambaga bundi busanzwe ariko ubu babonye igisubizo.

Biyakibyabo ni uwo mu murenge wa  Gahini, avuga ko ubusanzwe bakora ingendo ndende kandi buri munsi;guhabwa igare rero bikaba bizamufasha  muri byinshi akora.

Agira ati“Guturuka aho ntuye nerekeza ku  kigo nderabuzima hari ibirometero bisaga icumi  kandi sirwo rugendo nkora gusa , none ubu nzajya nifashisha igare ku buryo nizera ko bizanyorohereza mu kazi. Ikindi kandi rizamfasha no kwiteza imbere kuko nzajya ndikoresha n’indi mirimo yo mu rugo irimo.”

 Mugenzi we Mukandayisenga Marie Jose wo mu murenge wa  Murundi agira ati “Kuba igihugu giha agaciro ibyo dukora biradushimisha cyane, ubu rero ngiye kongera imbaraga mu kazi kange kuko iri gare rizajya rimfasha kugera ku bantu benshi,haba mu buryo bwo kuvura ndetse no gukora ubukangurambaga kandi ubukangurambaga ni ingenzi cyane by umwihariko uko abantu bakwiriye kujya bihutira kujya kwa muganga kuwaba agaragaweho n ibimenyetso by indwara y igituntu.”  

Ikigo cy' igihugu cy 'ubuzima RBC gishima cyane uruhare rw 'abajyanama b' ubuzima muri gahunda zinyuranye ariyo mpamvu bakwiriye ishimwe kubera uburyo bitanga .

Dr Yves Habimana Mucyo uyobora by’agateganyo Ishami ryo kurwanya igituntu mu Kigo cy’Igihugu cy’ubuzima (RBC) avuga ko impamvu batanze aya magare ku bajyanama babaye indashyikirwa ari ukugira ngo boroherezwe mu gukora akazi kabo ndetse no kugira ngo n’abandi nabo bashyiremo imbaraga ubutaha bazahabwe ibi bihembo.

Aganira na Radio Televiziyo Izuba yagize  ati “Akarere ka Kayonza kari inyuma mu kurwanya indwara y’igituntu, none ubu biragaragara ko hari intambwe bateye binyuze muri aba bajyanama b’ububuzima ari nayo mpamvu nyamukuru twabahembye kugira ngo tubashimire ndetse bibongerere imbaraga mu kazi kabo, ndetse kandi n’abandi nabo babonereho bashyiremo imbaraga”

Mu mwaka wa 2023/2024 mu Rwanda habaruwe abarwayi b’igituntu 8,551. Mu mwaka wa 2023 ku Isi yose habaruwe abarwayi b’igituntu barenga miliyoni 8 mu gihe abarenga miliyoni imwe bahitanywe nacyo. Mu bahitanywe n’igitungu, abagera ku bihumbi 161 bari bafite ubwandu bw’agakoko gatera SIDA.

RBC itangaza ko ubukangurambaga bugomba gukomeza binanyuze mu bajyanama b ubuzima kugira ngo hirindwe indwara y igituntu.

Titien  Mbangukira /Kayonza