RWAMAGANA : Abacitse ku icumu rya Jenoside yakorewe Abatutsi mu 1994 bahangayikishijwe no kutagira amacumbi

Uwanyirigira Jeanette yarokotse Jenoside yakorewe Abatutsi mu 1994 atuye mu mudugudu wa Rebero mu kagali ka Mwurile mu murenge wa Mwurile ati”Muri uyu mudugudu wose ni nge ufite inzu mbi,irashaje cyane turanyagirwa ,nabuze aho mpagaze nza mubacitse ku icumu  bakanga kumfasha  bakambwira ngo nzasanirwe n’abasirikare kuko umugabo wanjye yari umusirikare icyo nicyo kibazo mfite nta nikindi,uje ukareba aho mba nawe wagira agahinda”. 

 Ibi kandi abihuriyeho na Kumwami Stephan nawe avuga ko mu bihe bitandukanye inzu ye yagiye isenyuka akagerageza kuyisanira ariko kuri iyi nshuro avuga ko  ntabushobozi agifite ati”Umuyaga warayigurukanye bwa mbere ndayisanira, bwa kabiri iraguruka ndayisana irongera iraguruka birananira kuko nta bushobozi ngifite ,turasaba ko mudufasha mukadusanira inzu kuko nta bushobozi dufite ariko nibirenza uku kwezi kwa gatanu  izaba yangwiriye kandi mfite umugore n’abana batandatu .

Umuyobozi w’akarere ka Rwamagana Mbonyumuvunyi Radjab avuga ko ku bufatanye na Minubumwe  hari gukorwa urutonde rw’abacitse ku icumu batishoboye bafite inzu zishaje kugira ngo zisanwe mu buryo bwihuse ati “ Iki kibazo cy’inzu zishaje  kirahari kuko inyinshi zubatswe huti huti ariko mu buryo bwo gukemura iki kibazo turi gukorana na minisiteri ibishinzwe  kugira ngo abafite inzu zishaje zisanwe ndetse n’abatagira aho kuba bubakirwe kugira ngo tubivireho rimwe nko mu myaka ibiri gusa icyo kizaba cyakemutse.”

Inyinshi muri izi nzu zishaje zubatswe n’ikigega FARG mu mwaka 1998 Izindi zubakwa n’abaturage mu rwego rw’umuganda.Aba baturage bavuga ko uretse iki kibazo cy’inzu zishaje banahura n’ikindi kibazo cy’ubuvuzi cyane cyane ku bauye ubumuga ku nkoni bakubitswe muri Jenoside .

       Jane uwamwiza /Rwamagana