KAYONZA : Abangavu babyariye iwabo bahangayikishijwe no gutereranwa n’abo mu miryango y’ababahohoteye

Umwe muri aba  bakobwa babyaye bakiri abangavu twise Ernestine Uwimana ku bw’umutekano we ,  avuga ko mu bihe bya Covid 19 kubera imibereho igoye , yashutswe n’umusore wakoraga akazi ko mu rugo  akamutera inda ,ubu akaba abayeho aca inshuro muri rubanda ati”Yaranshutse antera inda ntabyiteguye , ubu mbayeho nabi kuko nca inshuro mu kwa rubanda kugira ngo ntunge umwana ,ntacyo amfasha kuko nawe ntiyishoboye, yateka amandazi n’abo mu muryango we barakennye ntacyo bamfasha  ”.

Naho uwo twahinduriye  amazina twise  Byukusenge Ange  ku bw’umutekano we ,yatwaye inda afite imyaka 17 kuko ubu afite 18  avuga ko yabyaranye n’umushumba kandi nabo mu muryango we ntibazwi  ati” Uwanteye inda akora akazi ko kuragira inka  nirwanaho gutyo, gusa numva nk’ubuyobozi bwamfasha nko kwiga imyuga kugira ngo mbashe gutunga umwana kuko n’iwabo simpazi wenda ngo ntakire abo mu muryango we babe bamfasha .”

Umunyamabanga  Nshingwabikorwa w’umurenge wa  Ruramira  Bisangwa Emmanuel avuga ko aba bana b’abakobwa batewe inda kandi  bakaba batishoboye  hari uburyo babafasha ati” Muri  covid hari ibibazo byagiye bivuka byugariza imiryango harimo no kuba harimo abana b’abakobwa batewe inda batarageze imyaka nyuma yaho rero hari ibyo twagiye tubafasha harimo no gusubizwa mu ishuri ndetse no kubigisha imyuga y’igihe gito”

Uyu muyobozi anagaruka ku bangavu babyaye bakomoka mu miryango itishoboye n’abababateye inda bakaba ntawo mu muryango wabo ufite ubushobozi  ati”Hari gahunda n’ubundi zisanzweho ku babyeyi babyaye cyangwa se  bakinatwite bagiye binjizwa muri izo gahunda”.

Mu mwaka wa 2020-2021 mu Karere ka Kayonza hagaragaye abakobwa 176 batewe inda batarageza imyaka y’ubukure

Jane   Uwamwiza /Kayonza