Umukinnyi Pogačar uheruka kwegukana 'Tour de France' yerekeje amaso i Kigali muri Shampiyona y’Isi
Umukinnyi nimero ya mbere mu mukino wo gusiganwa ku magare, ukomoka muri Slovenia Tadej Pogačar, yatangaje ko atazitabira Vuelta a Espana kugira ngo abashe kwitegura neza Shampiyona y’Isi izabera mu Rwanda muri Nzeri 2025.
Uyu mugabo ufite imyaka 26 wegukanye Shampiyona y’Isi ya 2024 mu gusiganwa mu muhanda, yabereye i Zürich mu Busuwisi, yerekeje amaso i kigali aho azitabira Shampiyona y'isi ya 2025.
Pogačar yatangaje ko atazitabira iri siganwa ryo muri Espagne kugira ngo aruhuke neza, bityo bizamufashe kwitegura Shampiyona y’Isi.
Agira ati “Ndifuza kuzagaruka meze neza by’umwihariko muri Shampiyona y’Isi.”
Irushanwa rukumbi muri atatu akomeye ku isi ataregukana ni iryitwa Vuelta a Espana, gusa yabaye uwa gatatu mu 2019 ari nayo nshuro yaryitabiriye gusa.
Ni ku nshuro ya mbere Shampiyona y’Isi igiye kubera ku Mugabane wa Afurika, ikazabera i Kigali hagati ya tariki 21 na 28 Nzeri 2025.
Lucien KAMANZI
