Ruhango: Abagize ihuriro ry’abafatanyabikorwa mu iterambere JADF, basabwe guhanga udushya

Mu gusoza iri murikabikorwa, umuyobozi w’akarere wungirije ushinzwe iterambere ry’ubukungu RUSILIBANA Jean Marie Vianney yasabye abagize iri huriro guhanga udushya no guhindura ubuzima bw’abaturage.

Yagize ati ”Twababwira ko barushaho gukomeza guhanga udushya, bijyana na gahunda y’igihugu cyacu, bijyana na gahunda ya NST2, bikajyana na gahunda ya DDS (District Development Strategy) dufite nk'akarere muri uyu mwaka. Harimo byinshi byo gukora."

Umuyobozi w’akarere wungirije RUSILIBANA Jean Marie Vianney (ifoto/N.Charles)

Niyomugaba Vedaste uhagarariye umuryango Food for the Hungry mu karere ka Ruhango na mugenzi we Uwamahoro Justine ukorera umuryango wa Inspire, Educate and Empower Rwanda (IEE); batangaza ko iyo baje mu bikorwa by’imurikabikorwa bunguka byinshi kandi bikabafasha kuganira n’ubuyobozi kubyo bakora.

Niyomubabo ati "Buri mwaka hagenda haza udushya, dushimira ko iyo twateranye nk'ubu ni umwanya mwizi wo kwigana, hari byinshi tugenda twunguka bituma natwe tugenda dukora neza kurushaho. Ariko cyane cyane twungurana ibitekerezo kuburyo dukora, ingorane duhuranazo n’uburyo twabikemura.” 

Akomeza yemeza ko iki gihe ari umwanya mwiza wo kuganira n’ubuyobozo ati ”Ni n’umwanya mwiza wo kongera kuganira n’ubuyobozi, kugaragaza ibyo dukora. Buriya iyo umuntu agaragaje ibyo akora biba byiza kurushaho, kuko bamugira inama kugira ngo akore neza, yaba anakora neza bakamutera akanyabugabo kugira ngo yongeremo umuriri bityo ibintu birusheho kugenda neza.”

Niyomugabo Vedaste umwe mubamuritse ibikorwa (ifoto N/Charles)

Uwamahoro we yagarutse ku dushya bazanye mu burezi aho bahugura abarezi kwigisha binyuze mu mikino ndetse n’indirimbo.

Ati ”Duhugura abarimu, bakigisha bifashishije imfashanyigisho, kandi bakigisha binyuze mu mikino ndetse no mu ndirimbo, kugira ngo umwana aze ku ishuri ataje gufata mu mutwe gusa ahubwo dukora ibyo twita (Learning by Doing) akiga ibintu yanumvise ashobora no kubana mu buzima bwose, akajya ahora abyibuka.”

Uwamahoro kandi yongeraho ati ”Abana benshi ntabwo bazi imihoro, ntabwo bazi amasuka, twebwe rero iyo tugiye kubigisha nk’ibikoresho by’ubuhinzi; dukora igikoresho mu bipapuro cyangwa muri bya bindi dukoresha aho ngaho iwacu, ariko noneho ukazanamo udushya.”

Mu ngengo y’imari y’uyu mwaka abafatanyabikorwa b’akarere ka Ruhango bakoresheje amafaranga agera kuri miliyari eshanu (5) z’amafaranga y’ u Rwanda.

Abaturage basuye ibikorwa bitandukanye (Ifoto/N.Charles)

Abatafanyabikorwa bashimiwe n’ubuyobizi bw’akarere (ifoto/N.Charles)

NTAMWEMEZI Charles/ Ruhango