Nyagatare: "Abakuru b’imidugudu ni ijisho ryo kwesa imihigo kuri twese"-Meya GASANA Stephen
Ubuyobozi bw’akarere ka Nyagatare butangaza ko mu gihe abakuru b’imidugudu bakoze neza inshingano baba bariyemeje igihe batorwa n’abaturage; bakazikora batiganda byaba igisubizo mu gutuma n’izindi nzego zesa imihigo.
Ibi umuyobozi w’akarere ka Nyagatare GASANA Stephen arabishimangira anashimira abakuru b’imidugudu bitanga mu nshingano zabo bakazirikana igihango baba bafitanye n’abaturage babatoye.
Hari mu mwihererero wahuje inzego z'ubuyobozi bw'umurenge wa Karangazi zirimo abakuru b’imidugudu, abayobozi b’utugari, ubuyobozi bw’umurenge bungurana ibitekerezo ku nsnganyamatsiko igira iti "umuturage ku isonga wishimye, utekanye, uteye imbere, ufite isuku ; ubumwe bwacu nizo mbaraga zacu".
Ashingiye kuri iyi nsanganyamatsiko ikubiyemo ibiganisha ku muturage ku isonga kandi witaweho ngo agire imibereho myiza anateye imbere; umuyobozi w’akarere ka Nyagatare Gasana Stephen ashima uruhare rw’abakuru b’imidugudu mu ishyirwa mu bikorwa ry’imihigo y’akarere, akavuga ko ari bo nkingi ya mwamba y’iterambere ryegereye abaturage.
Ati "Abakuru b’imidugudu ni ijisho ry’ubuyobozi. Imihigo yacu twese ni uko baba bahari, badufasha gushyira mu bikorwa ibyo tuba twiyemeje gukorera abaturage. Turabasaba ko bakomereza aho ndetse bagashyiramo izindi mbaraga bijyana no guhanga udushya kandi bagaharanira kuba umudugudu utarangwamo icyaha nka Gakoma."
Uyu mudugudu wa Gakoma ugarukwaho kenshi ni umudugudu umaze imyaka isaga icyenda utarangwamo icyaha ku buryo ufatwa nk’ishuri indi midugudu mu Rwanda yakwigiraho.
Umunyamabanga Nshingwabikorwa w’Umurenge wa Karangazi, Mutesi Hope nawe ashima uruhare rw’abayobozi b’utugari n’abakuru b’imidugudu mu gutuma umurenge uza ku isonga mu mihigo, avuga ko barajwe ishinga no kurushaho gukorera abaturage.
Ati "Uyu mwaka twiyemeje gukuba kabiri imbaraga. Dukomeze kuba hafi y’abaturage, tubakemurire ibibazo, dutange serivisi inoze kandi vuba."
Nk'uko byanashimangiwe muri uyu mwiherero, abakuru b’imidugudu bose bo mu murenge wa Karangazi biyemeje kongera umurego mu nshingano zabo, cyane cyane mu bikorwa bijyanye n’isuku, umutekano, ubwisungane mu kwivuza , uburezi, n’iterambere rusange; intego ari ugushyira hamwe.
Umurenge wa Karangazi ugizwe n’utugari 11 n’imidugudu 53; abakuru b’imidugudu n’abayobozi b’utugari bahize abandi mu ishyirwa mu bikorwa ry’imihigo y’umwaka wa 2024-2025 bahawe ishimwe n’indangamanota, bashimirwa ubwitange n’ubushake bagaragaje.
Titien MBANGUKIRA/ NYAGATARE
