Kayonza :Hakenewe ubufatanye bw'umubyeyi n'umwarimu mu kuzamura imitsindire y'umwana
Ababyeyi bo mu karere ka Kayonza basaba bagenzi babo gushyira imbaraga mu gufatanya n’ibigo by’amashuri ndetse n’ubuyobozi bw'inzego z’ibanze mu gukurikirana imyigire y’abana kuko bizarushaho gutuma haboneka umusaruro mu mitsindire.
Ibi babitangaza mu gihe hari abatunga agatoki bamwe mu babyeyi badaherekeza neza abana mu myigire yabo, bikaba byaba intandaro yo kudatsinda. Basaba ko hashyirwa imbaraga mu bufanye bw’umubyeyi, umurezi n’ubuyobozi bwaba ubw’ibigo by’amashuri bwaba n’ubw’inzego z'ibanze kugira ngo hatagira umwana usigara mu myigire .
Abayeyi baganiriye na IZUBA bahamya ko habayeho ubufatanye nta cyatuma hataboneka umusaruro mu myigire n’imitsindire y’umwana.
Ibi bishimangirwa na Abahujinkindi Anitha ni umubyeyi utuye mu mudugudu wa Cyeru,Akagari ka KAYONZA,Umurenge wa MUKARANGE,
Wagize ati "kuva mu buto bwanjye rero uko jye nize nabonaga ababyeyi banjye banzindura ngo ntakererwa, nagera ku ishuri mwarimu akatwigisha, twataha akaduha ibyo dukora nagera mu rugo ababyeyi bakansubirishamo ngo barebe ko nabifashe naho ntabyumva bakankosora; nagera ku ishuri mwarimu akanambaza niba ababyeyi hari icyo bamfasha namubwira ko bamfashije nkabona aramwenyuye. Byanyeretse ko ari byiza kandi byatumaga ntarangara kandi byatumye nsinda neza."
Arongera ati "numva rero buri mubyeyi n'ubu abikoze atya byatanga umusaruro kuko nanjye ubu mbikorera abana banjye kandi nyuzamo nkajya no ku ishuri kureba ko bigenda neza. Ubu bufatanye bwacu n’abarezi ni ingenzi."
Mugenzi we KABERA Vincent nawe asanga nta mubyeyi ukwiriye kudaherekeza umwana we mu myigire ye, agira ati "twese abayeyi ntituri shyashya, hari abo usanga basa nk’abaharira uburezi abarimu gusa ubwo se uwo mwana yatsinda gute.Birakwiye ko duhwiturana twese tugafatanya kuera umwna ano gutuma atsinda neza’’.
Mu nama yaguye y’uburezi y’akarere ka Kayonza mu byagarutsweho harimo nubu bufatanye bwatuma koko ireme ry’uburezi rikomeza kuzamuka. Abayobozi b’ibigo by’amashuri bavuga ko ubufatanye n’ababyeyi ari ingenzi.
Kanamugire pascal na David kayiranga ni abayobozi b’ibigo by'amashuri bahuriza ku kuba umwana mu muryango akurikiranywe, ku ishuri abarimu n'ubuyobozi bw‘ishuri bukamuhozaho ijisho umusaruro waboneka.
Kanamugire Pascal ati "twe ku ishuri ijisho rihora ku munyeshuri, n’abarimu bashinzwe kumuha uburere n’ubumenyi kandi n'abayobozi bandi bahozaho kuko mu nama zinyuranye havugwamo gukora ibishoboka ngo abana batsinde neza. Uruhare rw’umubyeyi wese rero ni ingenzi. Hari ababikora ariko n’abatabaherekeza uko bikwiriye bakwiriye kubyumva bigakorwa."
Umuyobozi w'akarere ka Kayonza Nyemazi John Bosco abishimangira ko ubu bufatanye bugomba guhoraho akanasaba ko aho butagaragara bigomba gushyirwamo imbaraga.
Yagize ati "umubyeyi cyangwa umwarimu hagize uba terera iyo umunyeshuri ntiyatsinda neza, birakwiye rero ko habaho ubufatanye ndetse no guhwiturana kugira ngo umwana yige neza kuko uwize neza anatsinda neza. Ni inshingano rero za buri ruhande kandi iyo habayeho ubufatanye umusaruro uraboneka; turanashimira byimazeyo ababyeyi bakurikirana imyigire y’abana,abarezi babigisha n'ubuyobozi bw’ibigo uburyo bitanga ngo ireme ry’uburezi rizamuke."
Inama y’uburezi mu karere ka Kayonza yanemeje ko mu bigiye kurushaho gushyirwamo imbaraga harimo kugenzura bihagije imyigire y’abana mu bigo; harimo ko abana badasiba cyangwa ngo bakererwe; kureba ko abarezi bigisha uko bikwiye,kugenzura mu buryo buhagije ibiribwa bigaburirwa abanyeshuri ku mashuri bigateguranwa isuku
