Espagne: FC Barcelona yubatse ibigwi itsinda Real Madrid inshuro enye muri uyu mwaka
Ikipe ya FC Barcelone yaraye itsinze ikipe ya Real Madrid ibitego 4-3, ikomeza kuyanikira ku rutonde rwa Shampiyona ya Espagne izwi nka La liga Stander . Ni mu mukino w’Umunsi wa 35 wakinwe kuri iki Cyumweru, tariki ya 11 Gicurasi 2025, ukaba wabereye ku kibuga Estadi Olímpic Lluís Companys muri Espagne.
Ni umukino watangiranye imbaraga nyinshi, dore ko ku munota wa gatanu gusa, ikipe ya Real Madrid yabonye igitego cya mbere gitsinzwe na Kylian Mbappe kuri penaliti.
Kylian Mbappe yatsinze ikindi gitego ku munota wa 15, kikaba cyafashije ikipe ya Real Madrid kurushaho kuyobora umukino ku bitego 2-0, ari nako FC Barcelone nayo yashyiragamo imbaraga ishaka kwishyura.
Nyuma y'iminota ine gusa, umukinnyi Gerard Martin yahise atera ishoti rikomeye ryashoboraga kuvamo igitego, gusa Umunyezamu wa Real Madrid, Thibaut Courtois, yahise awushyira muri koruneri.
Ni koroneri yatewe neza na Ferran Torres wayishyize ku mutwe wa Eric Garcia, na we ahita awushyira mu izamu ahita yishyura igitego cya mbere ku munota wa 19 w’umukino.
Iki gitego kikaba cyahise kigarura ikipe ya FC Barcelone mu mukino, itangira gusatira cyane ikipe ya Real Madrid, no kubona imipira y’imiterekano iturutse ku makosa yakorerwaga ba rutahizamu bayo barimo na Lamine Yamal.
Lamine Yamal yatsinze igitego cya kabiri cya FC Barcelone ku munota wa 32. Raphinha yashyizemo ikindi gitego cya gatatu mu minota ibiri gusa, nyuma yo guhabwa umupira na Pedri.
Bigeze ku munota wa 45, umukinnyi Raphinha yatsinze igitego cya 4 cyaturutse ku ikosa rya Lucas Vázquez wa Real Madrid watakaje umupira ari mu rubuga rw’amahina.
Muri uyu mukino hagaragaye impinduka ku ruhande rwa Real Madrid kuko Umutoza wayo Carlo Ancelotti yakuye mu kibuga Arda Güler na Dani Ceballos ashyiramo Brahim Díaz na Luka Modrić,i gice cya kabiri kikimara gutangira.
Umutoza wa Fc Barcelona Hansi Flick yakuyemo umukinnyi Gerard Martin na Pau Cubarsi ashyiramo Andreas Christensen na Alejandro Balde.
Ku munota wa 70, ikipe ya Real Madrid yabonye igitego cya gatatu, gitsinzwe na Kylian Mbappe wari mwiza muri uyu mukino; ni umupira yahawe na Vinicius Junior. Iki ni na cyo gitego cya nyuma cyabonetse muri uyu mukino warangiye ari 4-3.
Gutsinda uyu mukino, byatumye FC Barcelone ikomeza kuyobora urutonde rwa Shampiyona ya Espagne n'ikinyuranyo cy'amanota 7 kuko ifite 82 mu gihe Real Madrid iyikurikiye ifite amanota 75, ikarusha iyikurikiye amanota arindwi. Ibi bibaye mu gihe habura imikino itatu gusa ngo umwaka w’imikino wa 2024-2025 ugane ku musozo.
Uyu mukino ubaye uwa kane muri uyu mwaka, ikipe ya FC Barcelona itsinde mukeba wayo Real Madrid kandi yikurikiranya.
FC Barcelona yubatse ibigwi itsina Real Madrid inshuro enye mu mwaka umwe
Lucien KAMANZI
