Europa League final: Manchester United izahura na Tottenham Hotspurs kuri Stade ya San Mamés.

Manchester United y’ umutoza Ruben Amorim yari yizigamye ibitego 3-0 nyuma y’ umukino ubanza bakiniye i Bilbao icyumweru gishize. Nubwo bari babanjwe igitego na Mikel Jauregizar, iyi ikipe itaratsindwa na rimwe muri iri rushanwa yaje kwishyura igitego binyuze kuri Mason Mount mbere y’uko Casemiro, Rasmus Hojlund na Mount bongera gutsinda ibindi bitego mu minota ya nyuma.

Tottenham na yo yari yaratsinze ibitego 3-1 ikipe ya Bodo/Glimt yo muri Norvège, yanditse amateka yo kugera muri ½ cy’ irangiza bwa mbere. Mu gice cya mbere cy’ umukino wabereye i Bodo, ahatuye abantu 42,000, ntabwo habonetse igitego, ariko Dominic Solanke na Pedro Porro bahise batsinda ibitego bibiri mu gice cya kabiri bituma icyizere ku ikipe yakiniraga imbere y’ abafana bayo kigabanuka.

Nubwo gutsinda ubwabyo ari ingenzi, ikipe ya Spurs irifuza gukuraho agahigo ko kumara imyaka 17 itagira igikombe na kimwe. Muri uyu mwaka, igikombe cya Europa League kizanatanga amafaranga menshi cyane, kuko izacyegukana izahabwa miliyoni 13 z’ amayero utabariyemo ayo ikipe yagiye ibona buri uko irenze icyiciro. Si ibyo gusa, kuko Ikipe izacyegukana izahita ibona itike yo gukina irushanwa rya UEFA Champions League y’ umwaka utaha.

Hagati aho umukino wanyuma uheruka guhuza amakipe abiri yo mu bwongereza gusa uheruka kuba muri 2019, ubwo Arsenal na Chelsea bahuriraga i Baku muri Azerbaijan, umukino Chelsea yatwayemo igikombe bitayigoye.

Ikipe ya Spurs bakunda kwita The Lilywhites bisobanura “abambaye umweru” yigeze gutsinda Wolverhampton Wanderers ku mukino wa nyuma wa mbere wa UEFA Cup mu 1972.

Iyi kipe ya Spurs kandi imaze kwegukana iki gikombe inshuro ebyiri, aho yagitwaye bwa mbere mu 1972 n’ ubwa kabiri mu 1984, naho mu 1974 yatsinzwe na Feyenoord.

Ku ruhande rwa Manchester United, iyi ni inshuro ya gatatu igeze ku mukino wa nyuma wa UEFA Europa League mu myaka umunani ishize; batsinze Ajax mu 2017, ariko batsindwa kuri penaliti na Villarreal mu 2021.

Bitewe n’ uko Man United na Spurs zombi zitwaye nabi mu marushanwa y’ imbere mu gihugu, aya ni amahirwe atari yitezwe yo kwegukana igikombe ndetse no kongera kwitabira amarushanwa akomeye i Burayi.

Umukino wa nyuma wa UEFA Europa League uteganyijwe kuba ku wa Gatatu tariki 21 Gicurasi, saa tatu z’ ijoro ku isaha y’ i Kigali ukazabera kuri stade San Mames iherereye i Bilbao muri Espanye.

Jacques roger NSHIMYIMANA