Apostle Mignonne yashimiye abahanzi barimo Israel Mbonyi, Ben na Chance, Alexis Dusabe n'abandi
Mu giterane ngarukamwaka cyiswe “ 7 Days of Worship 2026 “cyateguwe na Women Foundation Ministries na Noble Family Church, Apostle Mignonne Kabera yashimye Alexis Dusabe, René na Tracy, Ben na Chance, Israel Mbonyi na Precious Stones.
Iki giterane cya 7 Days of Worship 2026 cyabaye kuva ku wa 7 kugeza ku wa 14 Kamena 2026, abacyitabiriye bahawe ubutumwa butandukanye bwibanze ku nsanganyamatsiko igira iti “Abba Father” iboneka mu Abagalatiya 4:6.
Iki giterane cyabereye muri Noble Family Church cyitabiriwe n’abaramyi n’abigisha batandukanye barimo Rev. Julian Kyula, umuramyi mpuzamahanga Noel Robinson, ndetse n’abaramyi bo mu Rwanda.
Muri iki giterane, Apostle Mignonne Kabera, washinze Noble Family Church na Women Foundation Ministries, yafashe umwanya wo gushimira bamwe mu bakozi b’Imana n’abahanzi ba Gospel avuga ko bagize uruhare rukomeye mu kwamamaza ubutumwa bwiza
Ni amateraniro yari yatumiwemo abaramyi n’abahanzi batandukanye barimo Ben na Chance, Alexis Dusabe, Rene & Tracy, Gaby Kamanzi, Sara Sanyu Uwera, Manzi Nelson, Pastor Gaudin Mutagoma, Rev. Baho Isaie, Rachel Uwineza, Muhoza Budete Kibonke uyobora Healing Worship Team Rwanda n’abandi.
Yagaragaje uburyo akunda itsinda rya Ben na Chance, ashimangira ko Ben ari umuntu ufite ubwenge bw’Imana budasanzwe.
Yagize ati: “Ben ni umugabo ufite ubwenge bw’Imana. Nakunze uburyo Chance yambwiraga ko hari ibintu Ben aba avuga akumva bari kumwe ariko nyine ntabe ari kubisobanukirwa neza muri ako kanya, akazabyumva nyuma.”
Yakomeje avuga ko Chance ari umuntu ukunda abantu kandi ushyigikira abahanzi bagenzi be.
