Espagne: Lamine Yamal yongereye amasezerano y’imyaka itandatu muri FC Barcelone
Umukinnyi Lamine Yamal watangiye gukinira FC Barcelone afite imyaka 15, yongereye amasezerano y'imyaka itandatu akina muri iyi kipe y’i Catalonia. Aya masezerano yahawe akazagera mu mwaka wa 2031.
Nk'uko tubikesha ikinyamakuru Yahoo Sports, Lamine Yamal yongereye amasezerano nyuma yo gufasha iyi kipe kwegukana ibikombe bitatu bikinirwa muri Espagne, birimo Igikombe cya Shampiyona, Copa de Rey ndetse na Super Coupe.
Ibi bikombe yabigizemo uruhare kuko mu mikino 55 yakinnye muri uyu mwaka wa 2024-2025, yatsinze ibitego 18, atanga n’imipira 25 yavuyemo ibindi.
Muri rusange amaze gutsindira FC Barcelone ibitego 25 mu mikino 115 amaze gukinira iyi kipe yakuriyemo. Amaze kandi guhamagarwa inshuro 19 mu ikipe y’igihugu ya Espagne, banaherutse kwegukana igikombe cy’i Burayi.
Lamine Yamal yiyongereye kuri Raphinha n’umutoza Hansi Flick nabo baherutse kongera amasezerano muri iyi kipe y’i Catalonia.
Lamine wanakiniye ikipe y’igihugu ya Espagne y’abatarengeje imyaka 15 mu mwakaka wa 2021; mu mikino 6 yayikiniye akaba yaratsinzemo ibitego 3. Ni mu gihe mu mwaka wa 2022 yakiniye Espagne y’abatarengeje imyaka 16, mu mikino 4 atsindamo igitego 1.
Muri 2022-2023 yakiniye ikipe ya Espagne mu batarengeje imyaka 17, mu mikino 10 yayikiniye atsindamo ibitego 8, mu mwaka wa 2022 kandi yanakinnye umukino umwe gusa mu ikipe y’igihugu y’abatarengeje imyaka 19.
Lamine Yamal wambara nimero 19; mu mikino 73 amaze gukinira FC Barcelona kuva yayigeramo, amaze gutsindamo ibitego 14. Amasezerano mashya yahawe azageza mu mpeshyi y'umwaka 2031.
Lucien KAMANZI
