Bresil: Neymar Jr yasanzwemo icyorezo cya Covid-19
Umukinnyi Neymar Junior ukinira ikipe Santos FC y’iwabo muri Brésil byemejwe ko yanduye icyorezo cya Covid-19 nk’uko iyi kipe yabitangaje kuri iki cyumweru.
Amakuru y'ubwandu bw'uyu mukinnyi akubiye mu itangazo Santos FC yashyize hanze, aho yavuze ko uyu rutahizamu wayo yanduye Covid-19; dore ko yatangiye kugaragaza ibimenyetso kuva ku wa kane tariki ya 5 Kamena 2025.
Biteganyijwe ko Neymar azongera gupimwa ku wa mbere tariki ya 9 Kamena 2025 kugira ngo harebwe niba iyi Covid-19 ikimugaragaramo.
Icyorezo cya Covid-19 cyateye Isi kuva mu mpera za 2019 giturutse mu Bushimwa. Cyaje gukwira ku Isi yose ndetse kiranayishegesha bikomeye kugeza muri 2021.
Kugeza ubu, ubwoko bushya bw’iyi virusi bwiswe NB.1.8.1, bubarirwa ku rugero rwa 10% by’ubwandu bwose ku Isi, kandi bwamaze kuboneka muri Irlande y’Amajyarugu ndetse Pays de Galles.
Ishami ry’umuryango w’abibumbye ryita ku buzima (OMS) rivuga ko Covid-19 ikomeje kwihinduranya guhera muri Mutarama na Gicurasi uyu mwaka wa 2025. Ubwoko buriho muri iki gihe bivugwa ko ari bwo bwihuta cyane mu gusakara mu bantu.
Kuva muri Mutarama 2025, ubwoko bwa Omicron bwakwirakwiye mu turere twinshi twa Leta Zunze Ubumwe za Amerika, muri Australie, Thailand, kandi ni bwo bwoko buri ku isonga mu Bushinwa no muri Hong Kong.
Lucien KAMANZI
