UEFA Champions League : Ikipe ya Liverpool yaraye itsinze Paris Saint Germain 1-0 irushwa cyane
Ikipe ya Liverpool yo mu gihugu cy’Ubwongereza yatsinze Paris Saint Germain yo mu Bufaransa igitego 1-0,mu gihe FC Barcelona yo mu gihugu cya Espagne yatsinze Benfica yo muri Portugal igitego 1-0, naho Fc Bayern Munich yo mu Budage yatsinze Bayer Leverkusen nayo yo mu Budage ibitego 3-0 mu mikino ibanza ya ⅛ cy’imikino ya UEFA Champions League.
Amakuru dukesha ikinyamakuru The sun umukino wahuzaga PSG yo mu Bufaransa na Liverpool yo mu Bwongereza niwo wari utengerejwe na benshi aho watangiye wihuta ikipe y’i Paris yari mu rugo kuri Stade Parc de Prince isatira cyane izamu rya Liverpool binyuze ku mipira myinshi yahindurwaga imbere y’izamu na Ousmane Dembélé igapfa ubusa.
Uyu mukino ugeze ku munota wa 22, Khvicha Kvaratskhelia yatsindiye Ikipe ya PSG igitego cya mbere ariko kiza kutemerwa n’umusifuzi nyuma yo kwitabaza ikoranabuhanga rya VAR, avuga ko umukinnyi Vitinha yamuhaye umupira yaraririye.
Mu minota 35, ikipe y’i Paris yakomeje kotsa igitutu Liverpool ariko umunyezamu Allison akabera ibamba, Dembélé na Bradley Barcola.
Igice cya mbere cyarangiye amakipe yombi anganya ubusa ku busa.
Liverpool yakomeje kugorwa cyane n’uyu mukino ubona idasatira nk’uko isanzwe ndetse Mohammed Salah igendaraho ba myugariro ba PSG bari bamwize neza.
Bitandukanye n’igice cya mbere, icya kabiri cyatuje amakipe yombi akinira cyane mu kibuga hagati, byatumaga n’uburyo bw’ibitego buba buke.
Ku munota wa 86, Harvey Elliott yasimbuye Salah. Nyuma y’umunota umwe gusa yinjiye mu kibuga yacomekewe umupira mwiza na Darwin Núñez atsinda igitego cya mbere cya Liverpool.
Umukino warangiye, Liverpool yatsinze Paris Saint-Germain igitego 1-0.
Mu yindi mikino yabaga uyu mugoroba wo kuwa Gatatu ikaba yasize, FC Barcelona yo muri Espagne itsinze Benfica yo muri Portugal igitego 1-0 cyatsinzwe na Raphinha.Naho Fc Bayern Munich yatsinze Bayer Leverkusen ibitego 3-0, mu gihe Inter de Milan yo mu Butaliyani yatsinze Feyenoord yo mu buholandi ibitego 2-0.
Imikino yo kwishyura muri 1/8 cya UEFA Champions League iteganyijwe ku wa Kabiri, tariki ya 11 Werurwe 2025.
Lucien Kamanzi /Kigali
