Ikipe y'Igihugu ya Cape Verde yaraye ikoze amateka

Cape Verde yinjiye mu gikombe cy'Isi cya 2026 bwa mbere nyuma yo kwitwara neza mu mikino yo gushaka itike, ibintu byari byaratumye abakunzi b'umupira bayiha amahirwe make yo kurenga amatsinda. Gusa, iyi kipe yerekanye ko ifite ubushobozi bwo guhangana n'amakipe akomeye ku isi.

Mu itsinda H, Cape Verde yanganyije na Espagne ubusa ku busa, yongera kunganya na Uruguay ibitego 2-2 mbere yo gusoza imikino yayo inganya na Saudi Arabia ubusa ku busa. Nubwo itigeze itsinda umukino n'umwe, amanota yakusanyije ndetse n'ibyavuye mu yindi mikino byayihesheje umwanya wa kabiri mu itsinda, biyemerera gukomeza muri 1/16 cy'irangiza.

Iyi ni inkuru idasanzwe kuko Cape Verde yabaye imwe mu makipe make cyane ageze mu cyiciro gikurikiraho atarinze gutsinda umukino n'umwe mu matsinda. Byongeye kandi, ni igihugu gifite abaturage batageze kuri miliyoni imwe, ariko cyashoboye guhangana n'ibihugu bifite amateka akomeye mu mupira w'amaguru.

Umutoza Bubista yashimye imyitwarire y'abakinnyi be, avuga ko ibanga ryabafashije ari ukwizera, ubufatanye no kudacika intege. Yavuze ko abakinnyi be bagaragaje umutima wo guharanira ishema ry'igihugu cyabo ndetse n'umugabane wa Afurika muri rusange.

Nyuma yo gukatisha itike ya 1/16, Cape Verde itegerejwe guhura na Argentina, imwe mu makipe ahabwa amahirwe yo gutwara iri rushanwa. Nubwo benshi baha amahirwe Argentina, Cape Verde yamaze kwerekana ko ishobora gutungura buri wese.

Amateka yanditswe na Cape Verde akomeje kongera icyizere ku makipe ya Afurika ko ashobora guhatana ku rwego rwo hejuru mu gikombe cy'Isi. Muri iri rushanwa rya 2026, Cape Verde yinjiye mu makipe ya Afurika yamaze kurenga amatsinda arimo Maroc, Afurika y'Epfo, Côte d'Ivoire, Misiri na Sénégal, agaragaza ko umupira wa Afurika ukomeje gutera imbere no guhatana n'ibihugu bikomeye ku isi.

Jacques Roger NSHIMIYIMANA