Hagaragaye indwara y'ubuganga mu turere 6,duhita dushyirwa mu Kato
Ikigo cy’Igihugu gishinzwe Ubuhinzi n’Ubworozi RAB, cyashyize mu kato amatungo arimo Inka, Ihene n’Intama yo mu turere dutandatu kubera indwara y’ubuganga.
Uturere twashyizwe mu kato ni Kirehe, Kayonza, Rwamagana, Gicumbi Rulindo na Burera.
Mu ibaruwa RAB yandikiye utu turere uko Ari dutandatu ku wa Gatanu tariki ya 26 Kamena 2026, idusaba gukumira indwara y’Ubuganga bwo mu kibaya cya rift (RVF).
Umuyobozi Mukuru w’Agateganyo wa RAB, Dr. Florence Uwamahoro, yagize ati “Nshingiye ku bisubizo by’ibizamini bya laboratwari byafashwe ku nka zororewe mu Karere ka Kirehe, Kayonza, Gicumbi, Rwamagana, Rulindo na Burera, ibizamini byaragaragaje ko ayo matungo yanduye indwara y’ubuganga bwo mu Kibaya cya Rift.’’
Umuyobozi mukuru wa RAB w'agateganyo yasabye abayobozi b’uturere gukumira indwara y’ubuganga bwo mu kibaya cya rift, bashyira mu bikorwa ingamba zirimo kwihutira kumenyekanisha itungo ryose rikekwaho cyangwa iryagaragaje ibimenyetso by’indwara y’ubuganga birimo umuriro mwinshi, itungo ryananiwe, itungo riva amaraso mu myanya iyo ariyo yose cyane mu mazuru.
Amatungo arimo inka, ihene n’intama ari muri utu turere uko Ari 6 azaguma aho yororewe kandi muri icyo gihe cyose nta tungo ryemerewe kuva mu gace kamwe rijya mu kandi. Inka,Ihene n’Intama zose zigomba gukingirwa iyi ndwara mu gihe kitarenze iminsi 7.
RAB yavuze ko kubaga Inka, Ihene n’Intama bihagaritswe muri utu turere dutandatu kugeza igihe hazakorerwa isuzuma rizemeza ko byasubukurwa.
By Jane Uwamwiza
