Ubwongereza:Trent Alexender- Arnold wa Liverpool ashobora kwerekeza muri Espagne.
Nk’uko ikinyamakuru The Sun cyo mu Bwongereza cyabitangaje, Trent Alexander-Arnold yamaze kwemeza ko azatandukana na Liverpool mu mpera z’uyu mwaka w’imikino, nyuma yo kwanga kongera amasezerano. Biravugwa ko ashobora guhita yerekeza muri Real Madrid.
Uyu mukinnyi ukina inyuma ku ruhande rw’iburyo, ari mu bakomeye ku mwanya we ku rwego mpuzamahanga. Ni umwe mu bakinnyi bazamukiye mu ishuri ry’abato rya Liverpool, aho yageze afite imyaka 6 y’amavuko.
Mu kiganiro yagiranye n’ishami ry’itangazamakuru n’itumanaho rya Liverpool, Trent yavuze ati:
“Nyuma y’imyaka 20 ndi muri Liverpool FC, nzagenda mu mpera z’uyu mwaka w’imikino.”
Amakuru atangazwa n’umunyamakuru w’imena mu bijyanye n’igura n’igurishwa ry’abakinnyi, Fabrizio Romano, yemeza ko Trent Alexander-Arnold yamaze kumvikana na Real Madrid ku masezerano y’imyaka itanu, kandi ibiganiro bimaze igihe bihagaze neza.
Trent afite imyaka 26 y’amavuko, akaba amaze gukinira Liverpool imikino 352, atsinda ibitego 23 anatanga imipira 92 yavuyemo ibitego. Yanatwaranye na Liverpool ibikombe byinshi birimo:
-
Shampiyona y’u Bwongereza (Premier League) – 2
-
FA Cup – 1
-
League Cup – 1
-
Community Shield – 1
-
UEFA Champions League – 1
-
UEFA Super Cup – 1
-
FIFA Club World Cup – 1
Real Madrid bivugwa ko imushaka cyane kubera ubuhanga bwe no kuba yakomeza gusimbura Dani Carvajal uri mu myaka yo gusoza umwuga.
