Rwanda: IZUBA Radio na TV yahawe igihembo cyo guteza imbere uburinganire mu biganiro n'amakuru

Iki gihembo cyatangiwe mu birori byo kwizihiza Umunsi Mpuzamahanga w’Ubwisanzure bw’Itangazamakuru  byabereye i Kigali kuri uyu wa 3/05/2024, byitabiriwe n’abanyamakuru batandukanye, abayobozi b’inzego za Leta, ndetse n’imiryango y’abagore bakora mu itangazamakuru.

Igihembo cyatanzwe ku bufatanye bw’ihuriro ry’amashyirahamwe y’abanyamakuru b’abagore, arimo: ARFEM (Ishyirahamwe  ry’Abagore bakora Itangazamakuru mu Rwanda), WMOC (Women Media Owners and Chief Editors), na WDM (Women in Digital Media) — iyi mikoranire ikaba ari ingufu zihurije hamwe mu rwego rwo guteza imbere uburinganire mu itangazamakuru nyarwanda.

Insanganyamatsiko y’uyu mwaka yagiraga iti: “Umusaruro w’Ikoranabuhanga ry’Ubwenge bw’Ubukorano (AI) ku Bwisanzure bw’Itangazamakuru.” hagaragajwe uburyo ikoranabuhanga rishobora gufasha itangazamakuru rishingiye ku mucyo, ririmo bose, mu kubaka sosiyete itekanye, irangwa n’ubutabera n’ubwisanzure.

Mu bikorwa by’ingenzi byashimiwe kuri uwo munsi, IZUBA Radio na TV yashimiwe by’umwihariko ku bw’imbaraga ishyira mu kugaragaza uburinganire mu nkuru zayo, binyuze mu nkuru n’ibiganiro bigaragaramo ijwi ry’abagore n’abagabo ku rugero rungana.

Murayire Protais, Umunyamabanga Nshingwabikorwa wa ADECCO/IZUBA Radio & TV, wakiriye iki gihembo, agaragaza ibyishimo n’ishimwe:

yagira ati: "Dushimishijwe n’iki gihembo. Ni ikimenyetso cy’uko ikigo cyacu cyiyemeje guha ijambo ringana abagore n’abagabo. Guteza imbere uburinganire si inshingano gusa nk’itangazamakuru, ni inkingi y’iterambere rirambye."

Yashimiye by’umwihariko umuryango Women in News (WIN) ku bufasha bwawo budasanzwe mu myaka itatu ishize. BINyuze mu mahugurwa, ubujyanama no gukoresha ibikoresho nka WIN Gender Balance Tracker, WIN yafashije IZUBA Radio & TV kunoza ibikorwa byayo bijyanye n’uburinganire haba mu micungire y’abakozi no mu itegurwa ry’ibiganiro.

yagize ati: "Turashimira cyane WIN kuba baraduherekeje muri uru rugendo. Inkunga yabo yabaye ingenzi mu kubaka itangazamakuru ririmo bose, no gutegura ibiganiro bituma ijwi ry’abagore n’abakobwa rihabwa agaciro." 

IZUBA Radio & TV ikorera mu Ntara y’Iburasirazuba, kandi imaze kumenyekana nk’umuyoboro w’itangazamakuru ryita ku burenganzira n’ubushobozi bw’umugore ndetse n’urubyiruko. Iyi radiyo na Televisiyo ikora ibiganiro bikangurira iterambere ry’ubukungu bw’abagore, uburezi bw’abakobwa, kurwanya ihohoterwa rishingiye ku gitsina, ndetse n’uruhare rw’abagore mu buyobozi n’iterambere.

Mu gihe u Rwanda rukomeje gukangurira itangazamakuru ryubahiriza uburinganire, aho intsinzi ya IZUBA Radio & TV ibaye urugero rwiza ku bindi b’itangazamakuru mu kwimakaza uburinganire, ubunyamwuga ndetse n’itangazamakuru rirengera buri wese.

Gacinya  M. Regina – Kigali, Rwanda