Ubwongereza: Liverpool irakoza imitwe y’intoki ku gikombe
Nkuko ikinyamakuru The Sun cyabyanditse, ikipe ya Liverpool irakoza imitwe y’intoki ku gikombe cya Shampiyona y’icyiciro cya mbere mu Bwongereza
Iyi kipe ikinira mu Mujyi wa Liverpool,yaraye itsinze ikipe ya Everton zikinira mu Mujyi umwe igitego 1-0,ikaba yakomeje kwanikira Arsenal iyigwa mu ntege,dore ko Liverpool ifite amanota 73,mu gihe ikipe ya Arsenal ya Kabiri ifite amanota 61,bikaba bivuze ko harimo ikinyuranyo cy’amanota 12 yose.
Igikombe cya Shampiyona y’icyiciro cya mbere mu Bwongereza(English Premier League), kirabura imikino 8 ngo kibone nyiracyo muri uyu mwaka w’imikino 2024-2025.
Kugeza ubu, ikipe ya Liverpool ikaba ariyo ihabwa amahirwe yo kugitwara,dore ko igiheruka mu myaka 4 ishize,kuko igiheruka mu mwaka w’imikino 2019-2020,kuva icyo gihe iki gikombe kikaba cyarakomeje kwiharirwa n’ikipe ya Manchester City.
Mu mikino isigaye uko ari 8 ngo Shampiyona y’Ubwongereza igane ku musozo,Liverpool muyo izakina isa n’ikomeye, ni nk’umukino uzayihuza na Arsenal tariki ya 10 Gicurasi 2025,ukazabanzirizwa n’uzayihuza n’ikipe ya Chelsea tariki 4 Gicursi 2025.
Lucien Kamanzi
