Ubwongereza: Ikipe ya Arsenal irifuza rutahizamu Viktor Gyokeres wa Sporting yo muri Portugal
Nk'uko tubikesha ikinyamakuru The Sun; ikipe y’abarashi (Arsenal) irifuza rutahizamu wa Sporting CP kuri miliyoni 60 z’ama pound akoreshwa mu gihugu cy'Ubwongereza. Ikipe ya Arsenal yiteguye gutanga aka kayabo ngo yegukane Viktor Gyokeres, umwe mu bakinnyi beza muri uyu mwaka w’imikino 2024-2025 mu gihugu cya Portugal.
Arsenal ni imwe mu makipe y'Iburayi yifuza uyu mu nya Swede ukina Shampiyona y’ikiciro cya mbere mu gihugu cya Portugal, izwi ku izina rya Liga Portugal mu ikipe ya Sporting Clube de Portugal; inahabwa amahirwe yo kwegukana Shampiyona y'uyu mwaka, mu gihe habura umukino umwe gusa ngo igere ku musozo.
Kugeza ubu, ikipe ya rutahizamu Viktor Gyokeres inganya amanota na Benifica Lisbone zose zifite amanota 79, gusa zikaba zitandukaniye ku bitego zizigamye, kuko Sporting CP izigamye ibitego 59 mu gihe Benifica yo izigamye ibitego 56.
N'ubwo uyu mukinnyi ukina ataha izamu yifuzwa n'ikipe ya Arsenal, imuhanganiye n’andi makipe nka Manchester United,Chelsea Fc zose zo mu Bwongereza, ndetse na Fc Barcelona yo mu gihugu cya Espagne.
Viktor Gyokeres muri uyu mwaka w’imikino 2024-2025, amaze kugira uruhare mu bitego 65, harimo 52 yatsindiye iyi kipe ndetse anatanga imipira 13 yavuyemo ibitego.
Lucien KAMANZI
