Ubwongereza: Igura n’igurisha ritwaye asaga Miliyari 3 z’amapawundi
Amakipe akina Shampiyona y’Icyiciro cya Mbere mu Bwongereza (Premier League), niyo yaje ku isonga mu guca agahigo ko gushora amafaranga menshi mu kugura abakinnyi muri iyi mpeshyi, aho kuri iyi nshuro yarenze kuri miliyari 3 z’Amapawundi (asaga miliyari 4.339 Frw).
Igiteranyo cya miliyari 2,73 z’Amapawundi ni yo yari amaze kwishyurwa ku bakinnyi kugeza ku wa 31 Kanama, ariko andi menshi yatanzwe ku munsi wa nyuma w’igura n’igurisha arimo ayaguzwe Alexander Isak wavuye muri Newcastle United ajya muri Liverpool kuri miliyoni 125 z’Amapawundi; yatumye igiteranyo cyose kiba miliyari 3,087 z’Amapawundi.
Aya mafaranga yose yatanzwe aruta ayashowe mu mpeshyi ya 2024, aho amakipe ya Premier League yari yatanze miliyari 1,96 z’Amapawundi.
Kugeza ubu, igiteranyo cy’uyu mwaka kiruta amafaranga yatanzwe n’amakipe yo muri Shampiyona ya Bundesliga y’u Budage, La Liga yo muri Espagne, Ligue 1 y’u Bufaransa na Serie A y’u Butaliyani, yose hamwe uyateranyije.
Amakipe yo muri Serie A mu Butaliyani yashoye miliyari 1,026£, mu gihe ayo muri Bundesliga mu Budage yo ari miliyoni 739,1£, Ligue 1 ni miliyoni 552,1£ naho ayo muri La Liga atanga miliyoni 591,3£.
Dore Ikipe zashoye menshi kurusha izindi
Ikipe ya Liverpool yashoye miliyoni 415 z’Amapawundi, ikabona miliyoni 187 z’Amapawundi mu bakinnyi yagurishije, ni yo yatanze amafaranga menshi muri iyi mpeshyi.
Ikipe ya kabiri ndetse ikaba iri mu makipe atanu yungutse ni Chelsea yatanze miliyoni 285£ ikinjiza miliyoni 288£, iyakuye mu bakinnyi yagurishije.
Andi makipe yungutse ni AFC Bournemouth yatanze miliyoni 120£ ikinjiza miliyoni 207£, Brentford yashoye miliyoni 85£ ikabona miliyoni 134£, Brighton yatanze miliyoni 69£ ikabona miliyoni 133£ na Crystal Palace yashoye miliyoni 47£ ikabona miliyoni 63£.
Ni mu gihe Arsenal ari yo yahombye amafaranga menshi kuko yatanze miliyoni 255£ ariko ikabona miliyoni 9£ ku bakinnyi yagurishije.
Ni abahe bakinnyi bakomeye bahinduye amakipe ku munsi wa nyuma?
Isoko ry’igura n’igurisha mu Bwongereza ryafunze ku wa Mbere, Saa Mbiri z’umugoroba ariko amakipe yari yamaze kuzuza ibisabwa yatangaje ko hari abakinnyi yasinyishije nyuma y’aho.
Igurwa rya Alexander Isak wabaye umukinnyi uhenze mu mateka y’umupira w’amaguru mu Bwongereza, ryemejwe ku isaha ya Saa Yine n’Igice z’ijoro mu gihe igurwa rya Marc Guehi ryapfuye ku munota nyuma, nyuma y’uko Crystal Palace yanze ko ajya muri Liverpool kuko itabonye umusimbura we.
Yoane Wissa yerekeje muri Newcastle aba asimbuye Alexander Isaac.
Nyuma yo kwemeza ko Isak agiye, Newcaslte United yatangaje ko yaguze rutahizamu wa Brentford, Yoane Wissa, atanzweho miliyoni 55£.
Abandi baguzwe barimo Umunya-Brésil Kevin waguzwe miliyoni 34,6£ muri Shakhtar Donetsk ajya muri Fulham, umunyezamu Senne Lammens wavuye muri Royal Antwerp ajya muri Manchester United kuri miliyoni 18,1£, Jadon Sancho watijwe muri Aston Villa avuye muri Manchester United ndetse na Harvey Elliott watijwe Aston Villa avuye muri Liverpol.
Randal Kolo Muani yatijwe na PSG muri Tottenham Hotspur FC
Ikipe ya Tottenham Hotspur FC yo yatiye Randal Kolo Muani avuye muri Paris Saint-Germain, mu gihe Ikipe ya Arsenal yatiye myugariro Piero Hincapie avuye muri Bayer Leverkusen; naho Ikipe ya Sunderland yinjiza ba rutahizamu barimo Brian Brobbey na Bertrand Traore, ndetse na myugariro Lutsharel Geertruida wavuye muri RB Leipzig ku ntizanyo y’umwaka umwe.
Muri rusange amakipe yo mu Bwongereza yagaragaje ukwiyubaka ku rwego rwo hejuru; abahanga bakagaragaza ko ari Shampiyona izaba iryoheye ijisho.
Lucien KAMANZI
Arsenal yinjije myugariro Piero Hincapie
Alexander Isaac kugeza ubu niwe umaze kugurwa amafaranga menshi mu mupira wo mu Bwongereza.
