Uburayi:Ibivugwa mbere y’uko Inter de Milan yakira FC Barcelone

Nk'uko The Sun yabyanditse,Imikino ya UEFA Champions League igeze ahakomeye, dore ko mu ijoro ryo kuri uyu wa Kabiri, tariki ya 6 Gicurasi 2025, ruza kwambikana hagati ya Inter Milan yo mu Butaliyani na FC Barcelone yo muri Espagne.

Uyu  mukino wo kwishyura ni uwa ½ ,ukaba Ikipe ya Inter Milan yo mu mujyi wa Milan irawakirira iwayo, uraza kubera  San Siro Stadium ,ikaba yakira abafana barenga ibihumbi 75.

Ikipe ya FC Barcelone yegukanye igikombe cya UEFA Champions League inshuro eshanu zose, ikaba iza gukina uyu mukino isabwa imbaraga zidasanzwe kugira ngo igere ku mukino wa nyuma uzabera mu budage kuri Stade ya Allianze Alena, dore ko mu mukino ubanza muri Espagne yanganyije ibitego 3-3,ariyo yawakiriye.

Kuba Inter de Milan ariyo igiye kwakira uyu mukino, ni amahirwe cyane kuko mu mikino 16 ya UEFA Champions League iheruka, ntiratsindirwa iwayo ahubwo yatsinze 13 inganya itatu gusa.

Aya makipe  yombi amaze guhura inshuro 17 mu mateka yayo. Inter Milan yatsinzemo  imikino itatu, mu gihe yatsinzwe imikino  umunani, akaba yaranganyije imikino itandatu yose..

Uyu ni umwaka mwiza kuri FC Barcelone, kuko mu marushanwa yose ihatanyemo iri kwitwara neza, ndetse yanamaze kwegukana Igikombe cya Super Cup n’icya Copa del Rey.

Mu kiganiro n’abanyamakuru cyabaye ku wa Mbere, Umutoza wa Inter Milan, Simeone Inzaghi, yavuze ko yizeye ko Kapiteni w’iyi kipe akaba na rutahizamu wayo, Lautaro Martínez, ashobora kuba ameze neza kuri uyu wa Kabiri.

Martínez ntiyagaragaye mu mukino Inter yatsinzemo Verona igitego 1-0 ku wa Gatandatu kubera imvune yagiriye mu mukino ubanza bahuyemo na FC Barcelone mu cyumweru gishize, aho yasimbuwe igice cya mbere kirangiye.

Inter iraza kuba ikina  idafite mu bwugarizi bwayo Benjamin Pavard akaba  yaravunikiye mu mukino batsinzwemo na AS Roma muri Shampiyona y’Ubutaliyani..

Mehdi Taremi yiteguye gukinana na Marcus Thuram mu gihe Martínez atagaragara mu kibuga kuri uyu wa Kabiri, ndetse Yann Bisseck ashobora kuziba icyuho cya Pavard mu bwugarizi iburyo.

Hakan Çalhanoğlu na we yiteguye gukina nyuma yo gusiba umukino uheruka mu Butaliyani kubera amakarita. Ni ko bimeze kandi ku barimo Yann Sommer, Alessandro Bastoni, Denzel Dumfries na Nicolo Barella, bose bari babanje mu basimbura ku mukino wa Verona.

Amahitamo akomeye muri iyi kipe yo mu Butaliyani ni ukumenya niba hakina Federico Dimarco na Carlos Augusto kugira ngo ibashe guhagarika Lamine Yamal umaze iminsi ugora amakipe menshi.

Inzaghi yavuze ko “bidashoboka” guhagarika uyu mukinnyi w’imyaka 17, ariko ashimangira ko amabwiriza azaha abakinnyi be azikuba kabiri.

Ku rundi ruhande, FC Barcelone yagaruye rutahizamu Robert Lewandowski utarakinnye imikino ine iheruka kubera imvune yo mu kibero.

Wojciech Szczesny arongera kubanza mu izamu mu gihe Marc-André ter Stegen atashyizwe mu bakinnyi 23 Barcelone yajyanye mu Butaliyani nubwo yari yakinnye umukino batsinzemo Real Valladolid mu mpera z’icyumweru.

Jules Koundé na Alejandro Balde basanzwe babanza mu kibuga inyuma ku mpande, bombi ntibakina kubera imvune, bivuze ko Eric García na Gerard Martín ari bo bagomba kujya iburyo n’ibumoso.

Frenkie de Jong na Pedri bitezwe mu bakinnyi babanza mu kibuga nyuma yo gukina iminota 45 kuri buri wese mu mpera z’icyumweru, ndetse na Dani Olmo arasubirana umwanya we wari wafashwe na Fermin Lopez wanatsinze igitego mu mukino wa Valladolid.

Muri uyu mukino byitezwe ko hashobora kubanzamo ku mpande zombie:

Inter Milan: Sommer; Bisseck, Acerbi, Bastoni; Dumfries, Barella, Calhanoglu, Mkhitaryan, Dimarco; Martinez, Thuram.

FC Barcelone: Szczesny; Eric, Cubarsi, Martinez, Martin; Pedri, De Jong; Yamal, Olmo, Raphinha; Ferran.

Lucien KAMANZI