Shai Gilgeous-Alexander yegukanye igihembo cya MVP muri NBA 2026.
Umukinnyi wa Oklahoma City Thunder, Shai Gilgeous-Alexander, yaraye yegukanye igihembo cy’umukinnyi mwiza wa shampiyona ya Basketball muri Amerika, NBA, cya 2026 (MVP), nyuma y’umwaka w’imikino yaranzwe n’udushya ndetse n’umusaruro udasanzwe yafashije ikipe ye kugeraho.
Shai Gilgeous-Alexander yegukanye iki gihembo nyuma yo kwitwara neza muri uyu mwaka w’imikino, aho yayoboye Oklahoma City Thunder mu mikino myinshi ikomeye. Uyu Munya-Canada yatsinze amanota menshi aho byibura yabarirwaga amanota 30 kuri buri mukino, akabarirwa imipira 6 atanga ivamo amanota, ndetse anagaragaza guhanga guomeye mu kibuga, ibintu byatumye abafana n’abasesenguzi bamugirira icyizere gikomeye.
SGA yaraye abaye umukinnyi wa 7 muri iki kinyejana ndetse n’uwa 14 mu mateka ya NBA wegukanye iki gihembo (MVP) inshuro 2 zikurikiranye. Abandi babikoze ni Nikola Jokic, Giannis Antetoounmpo, Stephen Curry, Lebron James wabikoze kabiri, Tim Duncan, ndetse n’umunya-Canada mwene wabo Steve Nash. Ikindi gikomeye yakoze nuko ntamukino numwe muri uyu mwaka w’imikino yigeze atsinda munsi y’amanota 20.
Gutangazwa kwe nk’umukinnyi mwiza wa NBA byatangajwe mu birori byitabiriwe n’abakinnyi, abatoza ndetse n’abakunzi ba Basketball ku isi yose. Mu ijambo rye nyuma yo kwakira igihembo, Shai yashimiye abo bakinana, umuryango we ndetse n’abafana bakomeje kumushyigikira kuva yatangira gukina Basketball ku rwego rwisumbuyeho.
Uyu mukinnyi w’imyaka 27 akomeje kuba icyitegererezo ku rubyiruko rukunda Basketball, cyane cyane muri Canada no muri Amerika. Abakurikiranira hafi NBA bavuga ko uburyo akinamo, ubushake ndetse no gukorera hamwe n’ikipe ye biri mu byamufashije kugera kuri uru rwego rwo hejuru muri siporo y’isi.
Kwegukana MVP kwa Shai Gilgeous-Alexander bibaye indi ntambwe ikomeye mu mateka ye muri NBA, ndetse benshi bakaba bemeza ko ashobora gukomeza kuyobora Oklahoma City Thunder mu rugendo rwo guhatanira igikombe cya NBA muri uyu mwaka.
Jacques Roger NSHIMIYIMANA
