RWAMAGANA : Abashinze radiotelevision Izuba batangije ikigo gishya cy’ishoramari
Ikigo cy’ishoramari cya Izuba media Ltd ni umushinga mushya w’ishoramari watangijwe n’umuryango utari uwa Leta Izuba community broadcasting organization ICBO mu magambo ahinnye .Uyu muryango wanashinze radiotelevision Izuba watangije iki kigo kuwa 17 Gashyantare 2024 mu nteko rusange y’umuryangio ICBO yahoze yitwa Adecco yateraniye mu karere ka Rwamagna .
Iki kigo cya Izuba media Ltd kiyobowe na Gahamanyi Jules kije ari igisubizo ku bibazo by’ubukungu byaturutse ku ngaruka za covid 19 kikaba kitezweho kongera umutungo no kunganira imishinga isanzwe yaratangijwe na ICBO mu myaka yashize nkuko byemezwa na Mugabo John watorewe kuyobora inama y’ubutegetsi ya ICBO akayibera n’umuvugizi mu matora yo gusimbura abari bagize manda icyuye igiye nayo yabereye muri iyi nteko rusange, aho anagaragaza ko yishimiye icyizere yagiriwe .Ati "Nabyakiriye neza ko inteko rusange y’uyu muryango wacu yangiriye icyizere nkaba ari njye ugiye kuwuyobora muri iyi myaka itatu ikurikira. Ndabizeza ko ntazabatenguha ,nakoze ibintu byinshi nibi rero ndumva nzabikora neza,icyerekezo cyacu ni ukwagura ibikorwa byacu bikagera kure , naho company twatangije uyu munsi ya Izuba Media Ltd nzafatanya na bagenzi banjye kugira ngo ikomere kandi ni intego tuzabigeraho.”
Munyandinda Emmanuel wayoboraga inama y’ubutegesti ya ICBO icyuye igihe avuga ko mu bikorwa byingenzi byakozwe mu myaka itandatu yari amaze kuri uyu mwanya harimo ko bwa mbere hashinzwe televiziyo ya mbere y’abaturage ikorera hanze ya Kigali ati" Iyi ni manda ya kabiri dusoje twatangiranye na radio Izuba, gusa twarayisanze kuko yo yatangiye mu mwaka wa 2004,ariko yaje kubyara televiziyo Izuba ntabwo twarekeye aho kuko twaje gutangiza na Izuba I Records itunganya amajwi n’amashusho mu buryo bwa gihanga kandi bugezweho, ariko uyu mushinga akaba ari uwo kunganira radio na televiziyo gusa twaje guhura n’imbogamizi y’ihungabana mu bukungu mu gihe k’imyaka itatu kubera icyorezo cya covid 19. Turashimira rero ubuyobozi bwiza bw’igihugu cyacu bwashyizeho ingamba z’umutekano ,ingamba z’ubumwe bw’Abanyarwanda no kwiteza imbere byatumye natwe tugira uruhare mu bikorwa byo guteza imbere abaturage n’igihugu cyacu .”
Umunyamabanga Nshingwabikorwa wa Izuba Community Broadcasting Organization Murayire Protais ashimira abasoje manda yemeza ko bagize imikoranire myiza n'ubuyobozi bucyuye igihe ,agasaba ubushya kuzakomeza kubafasha kugira ngo barusheho guteza imbere abaturage nkuko biri mu ntego zabo ati"Mu byukuri muri iyi myaka itandatu ishize twakoranye neza na komite icyuye igihe kuko twaragutse basize indi mishinga minini, icyo twifuza kuri komite yatowe nuko bakomeza kutuba hafi ndavuga mu guhugura abakozi bakongererwa ubumenyi binyuze mu kubategurira amahugurwa, ndetse bakadufasha no kubona ibikoresho byiza kandi bigezweho kugirango dukomeze gutanga ibintu bifite umwimerere”
Muri iyi nama y'inteko rusange hanavuguruwe amategeko agenga uyu muryango ,hanatorwa komite nshya izayobora umuryango ICBO muri manda y’imyaka itatu .Perezida w’inama y’ubutegetsi akaba n’umuvugizi w’umuryango ni Mugabo John ,yungirijwe na Nambaje Aphrodise , umubitsi ni Ingabire Anne Marie,Mukayisenga Emilienne ku mwanya w'ubunyamabanga .Abajyanama harimo Munyandinda Emmanuel,Ndamage Silas, Munyurangabo Félicien.Abagenzuzi hatowe Byukusenge Madeleine, Karasira Théophile,Nzabamwita Philippe naho abagize inama nkemurampaka ni Uwimana Néhémie, Mukabukuru Gorreth na Uwera Dinah Kitema.
Uwamwiza Jane /Rwamagana
