Misiri: Pyramids yegukanye Igikombe cya CAF Champions League ku nshuro ya mbere
Ikipe ya Pyramids yo mu gihugu cya Misiri yaraye itsinze Mamelodi Sundowns yo muri Afurika y’Epfo, zari zihanganiye igikombe cy’irushanwa rya CAF Champions League 2025 rikinwa n’amakipe yabaye aya mbere iwayo.
Uyu mukino wa nyuma muri ibiri ikinwa, wabereye mu Misiri kuri Stade ya Pyramids FC iherereye mu Mujyi wa Cairo mu Misiri, mu gihe ubanza wari wabereye muri Afurika y’Epfo, amakipe yombi anganya igitego 1-1.
Muri uyu mukino, abanya-Misiri ni bo bahabwaga amahirwe nk’abakiniraga mu rugo n’ubwo bakinaga n’ikipe y’ubukombe ku mugabane wa Afurika.
Mbere y’uko igice cya mbere kirangira ku munota wa 23, rutahizamu ukomoka muri DRC, Fiston Mayele yafunguye amazamu ku ruhande rwa Pyramids FC maze imibare itangira kuba mibi kuri Mamelodi.
Ikipe ya Pyramids na Mamelody Sundowns zikigaruka mu kibuga mu gice cya kabiri, Ahmed Samy yatsindiye Pyramids FC igitego cya kabiri ku munota wa 55, gusa ku munota wa 75, Rayners yaboneye Mamelodi Sundowns igitego n'ubwo kitari gihagije.
Ikipe ya Pyramids yakomeje gucunga neza izamu ryayo kugeza iminota 90 irangiye ihita yegukana igikombe cya CAF Champions League 2025 ku nshuro yayo ya mbere.
Ahmed Samy watsindiye Pyramids FC igitego cya kabiri, ni we wabaye umukinnyi witwaye neza muri uyu mukino (man of the match).
Iyi kipe ya Pyaramids ikinira kuri Sitade 30 June yashinzwe mu mwaka wa 2008, ikaba imaze imyaka 17 ishinzwe; nibwo bwa mbere yegukanye CAF Champions League mu mateka yayo.
Lucien KAMANZI
