James Milner asezeye gukina umupira w’amaguru nyuma y’imyaka 24
Umwongereza James Philip Milner w’imyaka 40, amaze gutangaza ko asezeye burundu gukina umupira w’amaguru nyuma y’imyaka 24 akinira ku rwego rwo hejuru. Milner asoje urugendo rwe asize amateka akomeye muri Premier League aho yabaye umukinnyi wakinnye imikino myinshi kurusha abandi bose mu mateka y’iyi shampiyona. (Source: The sun)
Milner yavukiye i Leeds mu Bwongereza tariki ya 4 Mutarama 1986, atangira gukinira ikipe y’ iwabo ya Leeds United mu 2002 afite imyaka 16 gusa. Icyo gihe yahise yandika amateka yo kuba umwe mu bakinnyi bato batsinze igitego muri Premier League. Nyuma yaho yakiniye Newcastle United, anyura muri Swindon Town mu buryo bw’ intizanyo mbere yo kujya muri Aston Villa.
Mu 2010 yerekeje mu ikipe Manchester City, aho yatwariye ibikombe bibiri bya Premier League mu 2012 no mu 2014, anatwara FA Cup ya 2011 na League Cup ebyiri. Mu 2015 yasinyiye Liverpool FC, aho yandikiye amateka akomeye kurushaho. Ari kumwe na Liverpool yatwaye UEFA Champions League ya 2019 i Madrid, anatwara Premier League ya 2020, igikombe Liverpool yari imaze imyaka 30 itatwara. Ikindi kandi yanatwaye n’ikipe ya Liverpool ibikombe bya FIFA Club World Cup na UEFA Super Cup mu 2019.
James Milner yahawe ibihembo bya 'Guinness des records' (source:bbc.com)
Muri 2023 yerekeje muri Brighton & Hove Albion, aho yakomeje gukina kugeza ku myaka 40. Muri Gashyantare 2026 yaciye agahigo kari gafitwe na Gareth Barry aba umukinnyi umaze gukina imikino myinshi muri Premier League, agera ku mikino 654 mbere yo kuyongera akagera kuri 658. Yanahawe ibihembo bitatu bya Guinness World Records birimo kuba umukinnyi wakinnye saison nyinshi zikurikiranya mu Bwongereza, zingana na 24 zose.
Ku rwego mpuzamahanga, Milner yakiniye ikipe y’ igihugu y’ ubwongereza imikino 61 hagati ya 2009 na 2016, aho yanitabiriye ibikombe bibiri by’isi ndetse n’ibikombe by’ uburayi bibiri.
James Philip Milner mu ikipe ya Manchester city. (source: thisisanfield.com)
James Milner asezeye ari umwe mu bakinnyi bubashywe cyane mu mupira w’ amaguru w’u Bwongereza. Mu myaka 24 yamaze mu kibuga, yakiniye amakipe atandatu akomeye, atwara ibikombe byinshi birimo Premier League eshatu, Champions League imwe, FA Cup ebyiri, UEFA Super Cup, FIFA Club World Cup ndetse n’ ibindi byinshi. Azahora yibukwa nk’umukinnyi wagiraga umurava, ikinyabupfura n’ubunyamwuga byamugize umwe mu bakinnyi bakomeye mu mateka ya Premier League.
Jacques Roger NSHIMIYIMANA
