Imikino :UEFA Champions League Arsenal yanyagiye PSV, Real Madrid itsinda Atlético Madrid
Mu mikino ibanza ya 1/8 cya UEFA Champions League yabaye ku mugoroba wo ku wa Kabiri tariki ya 4 Werurwe 2025, Arsenal yanyagiye PSV Eindhoven yo mu Buholandi ibitego 7-1, mu gihe Real Madrid yatsinze Atlético Madrid 2-1 mu mukino ukomeye wabereye mu Mujyi wa Madrid.
Uyu mukino w’abakeba bo muri Espagne watangiye ku muvuduko uri hejuru, maze ku munota wa Kane gusa, Rodrigo wa Real Madrid afungura amazamu nyuma yo kuzamukana umupira yihuta, agatsinda igitego cya mbere cyihuse.
Atlético Madrid ntiyacitse intege, ku munota wa mirongo itatu na Kabiri, Julián Álvarez yacenze abakinnyi barimo Eduardo Camavinga, atera ishoti rikomeye ryatumye yishyurira Atlético Madrid igitego cya mbere. Igice cya mbere cyarangiye amakipe yombi anganya igitego 1-1.
Mu gice cya kabiri, Real Madrid yagarutse iri hejuru, maze ku munota wa 55, Brahim Díaz anyeganyeza inshundura atsinda igitego cya kabiri, nyuma yo gucenga ba myugariro batatu ba Atlético Madrid.
Ku munota wa 70, umukino waratuje, amakipe yombi agenda akora impinduka, ariko nta busatirizi bukomeye bwongeye kuboneka. Mu minota ya nyuma, Real Madrid yagerageje gushaka igitego cya gatatu binyuze kuri Kylian Mbappé, Vinícius Júnior na Luka Modrić, ariko amahirwe arabura. Umukino warangiye Real Madrid itsinze Atlético Madrid ibitego 2-1.
Arsenal yandagaje PSV Eindhoven
Arsenal yagaragaje ubukaka bukomeye, inyagira PSV Eindhoven ibitego 7-1 mu Buholandi. Ikipe yo mu Bwongereza yigaragaje nk’ihanganiye igikombe, itsinda ibitego byinshi mu mukino wayo wa mbere muri 1/8.
Imikino yindi yabaye
- Borussia Dortmund yanganyije na Lille igitego 1-1.
- Aston Villa yatsindiye Club Brugge iwayo ibitego 3-1.
Imikino iteganyijwe kuri uyu wa Gatatu
Hateganyijwe indi mikino ikomeye ya UEFA Champions League kuri uyu wa Gatatu tariki ya 5 Werurwe 2025:
- Benfica (Portugal) vs Barcelona (Espagne)
- Paris Saint-Germain (France) vs Liverpool (Ubwongereza)
- Bayern Munich (Ubudage) vs Bayer Leverkusen (Ubudage)
- Feyenoord (Ubuholandi) vs Inter Milan (Ubutaliyani) (Uyu mukino uratangira saa 19:45 z’isaha y’i Kigali, mu gihe iyindi yose itangira saa 22:00.)
Aya makipe akomeye arahabwa amahirwe yo gukomeza muri 1/4 cya UEFA Champions League, bigatuma imikino y’uyu munsi iba itegerejwe cyane n’abakunzi ba ruhago ku isi hose.
Lucien Kamanzi / Kigali.
