Espagne: Umutoza Hansi Flick agiye kongera amasezerano mu ikipe ya FC Barcelone
Ikipe ya FC Barcelone iri mu nzira zo kwegukana Igikombe cya Shampiyona ya Espagne dore ko yamaze kwanikira mukeba wayo Real Madrid, irateganya kongerera amasezerano Umutoza Mukuru, Hans-Dieter Flick akazayitoza kugera muri 2027.
Ubwo Fc Barcelona yahuraga na Real Madrid ku Cyumweru, tariki ya 11 Gicurasi 2025, yayitsinze ibitego 4-3, mu mukino washimangiye urugendo rugana ku gikombe cya shampiyona, dore ko ari zo zihanganye.
Barcelona Fc ikimara gutsinda uyu mukino, ubuyobozi bwayo bwahise butangira ibiganiro biganisha ku kumwongerera amasezerano, dore ko na we yagaragaje ubushake bwo gukomeza kuyitoza.
Uyu mutoza Hansi Flick, amasezerano ye yari kuzarangira mu mwaka wa 2026, akaba azongererwa umwaka umwe ageze mu 2027. Aya masezerano azayashyiraho umukono nyuma yo gutwarana na Fc Barcelona Igikombe cya Shampiyona muri uyu mwaka wa 2024-2025.
Hansi Flick w’imyaka 60, anashimangira ko ikipe afite ari nziza kandi ihorana inyota yo gutsinda kuri buri mukino.
Aho agira ati “ntabwo buri gihe biba ari byiza nk’uko tubishaka. Duhora dushaka gukora ibirenze ku byo dukora, tuba twumva twaba turi bashya kuri buri mukino. Aho tugeze n’aho twerekeza ni heza.”
Ubusanzwe Hansi Flick ntakunda gusinya amasezerano amara igihe kirekire, uyu mwaka w’imikino wa 2024-2025 akaba yarahesheje FC Barcelone Igikombe cya Super Copa n’icya Copa del Rey, mu gihe abura imikino itatu gusa ngo ashyireho n’icya Shampiyona ya Espagne.
Lucien KAMANZI
