CECAFA Kagame CUP: APR FC yisanze mu itsinda rya kabiri
Ikipe ya APR fc ihagarariye u Rwanda mu rirushanwa CECAFA Kagame Cup 2025 yisanze mu itsinda rya kabiri ririmo NEC Fc ya Uganda, Bumamuru yo mu gihugu cy’Uburundi ndetse na Mlandege ya Zanzibar.
Tombola igaragaza uko amakipe 12 azahura muri CECAFA Kagame Cup 2025 yabaye kuri uyu wa kane, tariki 28 Kanama 2025 ibera I Nairobi muri Kenya.
Muri iyi mikino itsinda A ririmo Singida Black Stars yo mu gihugu cya Tanzania, Garde Cotes FC yo Djibouti, Ethiopia Coffee yo muri Ethiopia ndetse na Kenya Police FC yo mu gihugu cya Kenya.
Naho itsinda B ririmo APR FC yo mu Rwanda, NEC FC yo muri Uganda, Bumamuru yo mu gihugu cy'Uburundi ndetse na Mlandege yo muri Zanzibar.
Ni mu gihe itsinda C ririmo Al Hilal Omdurman yo muri Sudani, Kator FC yo muri Sudani y’Epfo, Mogadishu City Club yo mu gihugu cya Somalia ndetse na Alahly SC Wad Madani yo muri Sudani.
Muri iri rushanwa, ikipe izaba iya mbere muri buri tsinda, hiyongereyeho iyabaye iya kabiri yitwaye neza kurusha izindi, ni zo zizahita zerekeza muri ½ cy’irangiza.
Ni irushanwa riteganyijwe kubera i Dar es Salaam tariki 2-15 Nzeri 2025; ku bibuga bya Azam Complex iri Chamazi na KMC Stadium iri Kinondoni.
Mu mwaka ushize wa 2024, iri rushanwa ryegukanywe na Red Arrows FC yo muri Zambia itsinze APR FC yo mu Rwanda penaliti 10-9 nyuma yo kuganya igitego 1-1 mu minota 120 y’umukino.
APR FC iheruka kwegukana CECAFA Kagame Cup mu 2010 itsinze St. George yo muri Ethiopia ibitego 2-0.
Iri rushanwa rizatwara akayabo ka Miliyoni zisaga 400 mu mafaranga y’u Rwanda.
Lucien KAMANZI
