Amavubi y’Abagore yasubiye ku mwanya mubi kuva yabaho
Ikipe y’Igihugu y’Abagore yamanutse imyanya ibiri ku rutonde rw’Ishyirahamwe ry’Umupira w’Amaguru ku Isi (FIFA), iba iya 168. Uru rukaba ari rutonde rwasohotse kuri uyu wa Kane, tariki ya 7 Kanama 2025, rwabaye urutonde rwa gatatu muri uyu mwaka nyuma y’urwo mu kwezi kwa Werurwe ndetse n’urwo muri Kamena.
Iyi Kipe y’igihugu y’abagore yatakaje imyanya ibiri nyuma y’uko iheruka umukino muri Gashyantare ubwo yasezererwaga na Misiri mu gushaka itike y’Igikombe cya Afurika aho yatsinzwe ku giteranyo cy’ibitego ibitego 3-2 .
Ikipe y’Igihugu She-Amavubi yagumanye amanota 892,39 n'umwanya wa 168 nyuma yo gutakaza undi mwanya umwe ikaba iya 166 muri Kamena.
U Rwanda rwari rwungutse imyanya itatu n’amanota 17,58 muri Werurwe nyuma yo gukina na Misiri imikino ibiri.
Umwanya mwiza Amavubi y’Abagore yagize mu mateka yayo ni uwa 105 mu Ukuboza 2017 mu gihe kuri ubu yasubiye ku mwanya mubi mu mateka yawo, yagezeho bwa mbere mu Ukuboza 2024.
Nigeria ya 36 ku Isi, iheruka kwegukana Igikombe cya Afurika, ni yo ya mbere kuri uyu Mugabane mu gihe u Rwanda ari urwa 34.
Ni mu gihe urutonde rwa FIFA ruyobowe na Espagne yasimbuye Leta Zunze Ubumwe za Amerika naho u Bwongereza buheruka kwegukana EURO 2025 ari ubwa kane inyuma ya Suède ya gatatu.
Ibihugu 196 ni byo biri ku rutonde rwa FIFA rw’uku kwezi mu makipe y’abagore mu gihe muri Afurika ari 47.
Ku bihugu bituranye n’u Rwanda, Repubulika Iharanira Demokarasi ya Congo ni iya 116 ku Isi, Tanzania 131, Uganda 147 naho u Burundi ni ubwa 178.
Urutonde rusoza umwaka ruzashyirwa ahagaragara ku wa 11 Ukuboza 2025.
Lucien KAMANZI
