Ubwongereza: Francesco Farioli utoza Ajax ashobora gusimbura Ange Postecoglou muri Tottenham
Umutaliyani Francesco Farioli, utoza ikipe ya Ajax yo mu Buholandi, ashobora kwerekeza muri Tottenham Hotspur yo mu Bwongereza, aho bivugwa ko yaba agiye gusimbura Ange Postecoglou, umaze igihe adatanga umusaruro ushimishije.
Nk’uko ikinyamakuru The Sun cyabitangaje, Farioli w’imyaka 36 ubu atoza Ajax Amsterdam ibarizwa mu cyiciro cya mbere cy'umupira w’amaguru mu Buholandi (Eredivisie). Yatangiye gutoza iyi kipe mu mwaka wa 2024 avuye muri OGC Nice yo mu Bufaransa, aho yari ayoboye muri shampiyona ya Ligue 1.
Uyu mutoza w’Umutaliyani wahoze akinira nk’umuzamu, yavukiye i Barga mu Butaliyani mu 1989. Amateka ye mu mupira arimo no kuba yarigeze kwigishwa na Roberto De Zerbi wahoze atoza Brighton & Hove Albion yo mu Bwongereza.
Mu mpera z’icyumweru gishize, Ajax ya Farioli yasoje shampiyona ya Eredivisie itakaje amahirwe yo kwegukana igikombe, nubwo yatsinze FC Twente ibitego 2-0 ku munsi wa nyuma.
Biteganyijwe ko Ange Postecoglou ashobora gutandukana na Tottenham muri iyi mpeshyi, kabone n'ubwo yaba yegukanye igikombe cya Europa League, umukino wa nyuma ukazakinwa ku wa Gatatu tariki ya 21 Gicurasi 2025, hagati ya Tottenham na Manchester United.
Postecoglou amaze umwaka umwe atoza Tottenham, ariko ntiyigeze ahesha ikipe itike ya UEFA Champions League nk’uko byari bimeze ku mutoza Mauricio Pochettino wamubanjirije. Gusa birashoboka ko uyu mutoza w’Umunya-Australia yasohokana igikombe cya Europa League, nk’uko bishoboka ko aribwo bwa nyuma ayiyobora.
Nubwo Tottenham igiye gukina umukino wa nyuma wa Europa League, iri ku mwanya wa 17 ku rutonde rwa shampiyona y’u Bwongereza, aho hasigaye umunsi umwe gusa ngo shampiyona irangire, ibintu bituma impinduka ku mwanya w’umutoza zishobora kuba ngombwa.
Lucien KAMANZI
