Libya: Leta y'Uburasirazuba yabujije abaturage b'ibihugu bine bya Afurika Kwinjira mu gihugu
Kuwa kabiri w’iki cyumweru Leta y’Uburasirazuba bwa Libiye yabujije abaturage b’ibihugu bine kwinjira muri iki gihugu; ibi bikaba biri mu rwego rwo kongera kuvugurura imicungire y'abanyamahanga binjira muri Libya.
Ibihugu bya Sudan, Eritrea, Ethiopia ndetse na Somalia nibyo bihugu byangiwe kwinjira ku butaka bwa Libya mu buryo bwose bwaba ubw'inzira y’ikirere ndetse n’inzira y’ubutaka nk’uko byatangajwe n’iyi Leta iri mu mugi wa kabiri munini Benghazi, ikaba ibangikanye na Leta yemewe iri i Tripoli.
Leta ya Benghazi iyobowe na Osama Hamad ishamikiye ku gisirikare kiyobowe na Khalifa Haftar, iyi Leta ikaba iyobora Uburasirazuda ndetse n’igice kinini cy’Amajyepfo ya Libya.
Ni mugihe Leta ya Tripoli ariyo yemewe ku rwego mpuzamahanga, iyobowe na Abdulhamid Dbeibah wagiye ku butegetsi mu mwaka wa 2021 bigizwemo uruhare n’Umuryango w’Abibumbye.
Iyi Leta yo mu Burasirazuba yabwiye ibiro ntaramakuru by’Bongereza (Reuters) ko uyu mwanzuro wafashwe mu rwego rwo kongera kuvugurura imicungire y’abanyamahanga binyira muri iki gihugu cya Libya.
Icyo cyemezo ntikireba abagize za ambasade n'ibiro bya konsula byemewe n'amategeko, ndetse n'abagize imiryango yabo bakomoka muri ibyo bihugu bine.
Nanone kandi abari mu nzego z’uburezi ndetse n’inzego z’ubuvuzi ntibarebwa n’iri tegeko mu gihe bafite ibyangombwa bibemerera gukora muri izo serivisi ndetse n’amasezerano y’akazi.
Libya yabaye icyambu cy’abimukira bava muri Afurika bagiye mu bihugu by’Iburayi baca mu Nyanja ya Mediterane aho baba bahunze amakimbirane n’intamabara ndetse n’ubukene mu bihugu bakomokamo.
Uburengerazuba bwa Afurika, ni icumbi ry’abimukira basaga ibihumbi 900,000 nk’uko bigaragazwa na raporo y’umuryango w’abibumbye mu ikusanyamakuru ryakozwe mu ntangiro z’uyu mwaka.
