Pep Guardiola yanenze Tuchel nyuma yo gutsindwa na Argentine

Pep Guardiola yavuze ko Thomas Tuchel yagize amakosa mu mikinire yahisemo imbere ya Argentine, igihugu cyari cyagaragaje inshuro nyinshi muri iri rushanwa ko gishobora kwishyura no guhindura umukino n'ubwo kiba kiri inyuma ku manota.

Mu magambo yatangajwe n'ibitangazamakuru bitandukanye, Guardiola yagize ati: "Ndashinja Thomas Tuchel iyi ntsinzwi. Abakinnyi bakoze ibishoboka byose." Yakomeje avuga ko Tuchel yari akwiye kumenya amateka y'Argentine muri iri rushanwa, kuko yagaragaje inshuro nyinshi ubushobozi bwo kugaruka mu mukino iyo bahuye n'amakipe ahitamo gukinira inyuma akarinda igitego.

Thomas Tuchel

Guardiola yanabajije impamvu ikipe ifite abakinnyi bafite ubushobozi kurusha abo bahanganye yahitamo gukina yugarira nyuma yo kubona igitego kimwe. Yagize ati: "Kuki murinda igitego kimwe kandi mufite abakinnyi beza kurusha abo muhanganye?"

Ibi bitekerezo bihuye n'ibimaze igihe bivugwa n'abasesenguzi b'umupira w'amaguru, bavuga ko gukina wugarira cyane iyo uhanganye n'ikipe ifite ubushobozi bwo kugumana umupira no gushaka ibitego nk'Argentine bishobora kuvamo gutsindwa.

Mu marushanwa atandukanye, Argentine yakunze kugaragaza ubudacogora, ikagaruka mu mikino yasaga n'iyayicitse. Ni imwe mu mpamvu zituma amakipe amakipe asabwa gukomeza gushaka ibindi bitego aho kwishingikiriza ku kurinda icyo yamaze kubona.

Nubwo amagambo ya Guardiola yakwirakwijwe cyane ku mbuga nkoranyambaga no mu bitangazamakuru, nta tangazo riratangazwa na Thomas Tuchel cyangwa ikipe bireba risubiza ibyo anenga.

Amagambo ya Pep Guardiola akomeje guteza impaka mu bakunzi b'umupira w'amaguru, aho bamwe bashyigikiye ibitekerezo bye, mu gihe abandi bavuga ko gutsinda cyangwa gutsindwa biterwa n'impamvu nyinshi zitari amayeri y'umutoza gusa. Icyakora, benshi bahuriza ku kuba guhangana na Argentine bisaba gukomeza gukina ushaka ibitego kugeza umukino urangiye, aho kwisubiza inyuma ukarinda igitego kimwe.

Jacques Roger NSHIMIYIMANA