Gicumbi: Intore z'Itorero Indangamirwa rya 16 zakuye amasomo ku Mulindi, ziyemeza gukomeza kubaka igihugu

Abitabiriye uru ruzinduko barimo urubyiruko rwiga cyangwa ruba mu mahanga, abasoje amashuri yisumbuye mu mashuri mpuzamahanga yo mu Rwanda, ababaye indashyikirwa ku Rugerero rw'Inkomezabigwi icyiciro cya 13 ndetse n'abanyeshuri bo mu mashuri makuru na kaminuza. Itorero Indangamirwa rya 16 ririmo kubera mu Kigo cy'Amahugurwa cya Gisirikare cya Gabiro kuva ku wa 1 Nyakanga 2026, rikazasozwa ku wa 10 Kanama 2026.

Bageze ku Mulindi, Intore zasobanuriwe amateka y'urugamba rwo kubohora igihugu, uko rwatangiye, uburyo rwateguwe, imbogamizi zaruranze n'uburyo rwarangiye igihugu kibohowe. Banamenyeshejwe uruhare rw'Umulindi w'Intwari nk'icyicaro gikuru cy'Ingabo za RPA-Inkotanyi mu gihe cy'urugamba rwo kubohora igihugu.

Umunyamabanga Uhoraho muri Minisiteri y'Ubumwe bw'Abanyarwanda n'Inshingano Mboneragihugu (MINUBUMWE), Uwitonze Eric Mahoro, yavuze ko uru ruzinduko rugamije gufasha urubyiruko gusobanukirwa amateka nyayo y'igihugu no kurwibutsa inshingano zarwo zo kurinda no gusigasira

 ibyagezweho.

Yagize ati: "Amateka yo kubohora igihugu ni ishingiro ryo kubaka ejo hazaza. Turashaka ko uru rubyiruko rumenya aho igihugu cyavuye, rukumva agaciro k'ibyagezweho, bityo rukagira uruhare mu kubisigasira no gukomeza guteza imbere u Rwanda."

Yakomeje avuga ko gusura ahantu ndangamateka nk'Ingoro ya Mulindi bifasha urubyiruko guhuza inyigisho ruhabwa n'ibimenyetso bifatika by'amateka, bikarwubakamo ubwitange, ubupfura, ubunyangamugayo n'urukundo rw'igihugu.

Bamwe mu bitabiriye uru ruzinduko bavuga ko rwabafashije gusobanukirwa amateka yo kubohora igihugu kurushaho, ndetse rubongerera ishema ryo kuba Abanyarwanda.

Umwe mu Ntore yagize ati: "Twari dusanzwe twumva amateka yo kubohora igihugu, ariko kuyigishwa turi aho ayo mateka yabereye byatumye tuyasobanukirwa kurushaho. Biduteye ishema ryo gukunda igihugu no kumva ko natwe dufite uruhare mu gukomeza kukubaka no kugiteza imbere."

Undi na we yavuze ati: "Twabonye ko ibyo igihugu kimaze kugeraho byasabye ubwitange n'ubutwari bukomeye. Tugiye gukomeza kuba intangarugero aho turi hose, kurinda ubumwe bw'Abanyarwanda no gutanga umusanzu wacu mu iterambere ry'igihugu."

Urubyiruko rwiga cyangwa ruba mu mahanga narwo rwagaragaje ko uru ruzinduko rwabafashije kongera gusobanukirwa amateka y'igihugu cyabo no kumva ko, n'ubwo baba bari hanze y'u Rwanda, bafite inshingano zo gukomeza kuruhagararira neza no kugira uruhare mu iterambere rwarwo.

Ubuyobozi bw'Itorero Indangamirwa buvuga ko gusura Ingoro y'Amateka yo Kubohora Igihugu biri mu bikorwa bigamije kubaka urubyiruko rufite ubumenyi ku mateka y'igihugu, ruyakuramo amasomo azarufasha kuba abaturage n'abayobozi beza b'ejo hazaza, barangwa n'ubumwe, ubutwari, ubupfura no gukunda igihugu.

Itorero Indangamirwa ni imwe muri gahunda z'Igihugu zigamije gutoza urubyiruko indangagaciro z'Ubunyarwanda, kurwongerera ubumenyi ku mateka y'igihugu no kurutegurira kugira uruhare rufatika mu rugendo rwo gukomeza kubaka u Rwanda rufite ubumwe, amahoro n'iterambere rirambye.